O‘zbekiston prezidenti yordamchisi Saida Mirziyoyeva shaxmatchi Afro‘za Hamdamovani jahon chempionatidagi muvaffaqiyatli ishtiroki bilan tabrikladi.
Afro‘za Hamdamovani rapid bo‘yicha jahon chempionatidagi ulkan yutug‘i bilan tabriklaymiz!
Atigi 15 yoshida u musobaqaning haqiqiy sensatsiyasiga aylandi, dunyo reytingining Top-20 taligiga kirdi va iqtidor hamda mehnatning chegarasi yo‘qligini isbotladi.
Barakalla, Afro‘za! Sen xalqimizning faxrisan!, deb yozdi Saida Mirziyoyeva.
AQSHning Nyu York shahrida o‘tayotgan shaxmat bo‘yicha rapid yo‘nalishidagi jahon chempionatining ayollar o‘rtasidagi musobaqasida Afro‘za Hamdamova tarixiy natija qayd etdi. U 11 imkoniyatdan 8 ochko jamg‘arib, qo‘shimcha ko‘rsatkichlarga ko‘ra 6-o‘rinni egalladi. Afro‘za so‘nggi kun oldidan 5,5 ochko bilan 15-pog‘onada borayotgandi.
Hamdamova kecha tunda o‘tkazilgan 3 ta partiyadan 2 tasida g‘alaba, 1 tasida durang qayd etdi. Musobaqa davomida faqat bitta uchrashuvda imkoniyatni boy berdi. Turnirda 83-raqam ostida tasniflangan Hamdamova uchun bu haqiqatan ham tarixiy natija. Afro‘za 6 g‘alaba, 4 durang va 1 mag‘lubiyat evaziga 8 ochko jamg‘ardi.
Izoh (0)