Yangiobod bozori — Toshkent shahridagi eng mashhur bozorlaridan biri bo‘lib, u o‘zining keng savdo maydoni, xilma-xil mahsulotlari va o‘ziga xos muhitga ega. Bozor Toshkentning shimoliy qismida joylashgan bo‘lib, aholining turli ehtiyojlarini qondiruvchi savdo maskani hisoblanadi.
Bu yerda dehqonchilik va qishloq xo‘jaligi mahsulotlari, meva va sabzavotlar, milliy taomlar, kiyim-kechak, uy-ro‘zg‘or buyumlari kabi keng turdagi mahsulotlarni topish mumkin. Ayniqsa, Yangiobod bozori o‘zining arzon narxlari va xilma-xil tanlovi bilan xaridorlarni o‘ziga jalb qiladi. Bozor nafaqat savdo uchun, balki odamlar o‘rtasida muloqot, uchrashuvlar va kunlik hayotning ajralmas qismi sifatida ham mashhur. Bu yerda bozor muhitini his etish, xalqning kundalik turmush tarzi va an’analarini ko‘rish mumkin.
Yangiobod bozori ayniqsa, dam olish kunlari gavjum. Turli savdogar va xaridorlar bozorni jonli va rang-barang qiladi. Bozorning muhim afzalliklaridan biri – u yerga jamoat transporti orqali osongina yetib borish mumkin. O‘zbekistonning milliy ruhini his qilishni istagan har bir inson Yangiobod bozoriga tashrif buyurishi tavsiya etiladi. Bu nafaqat xarid qilish, balki madaniyat bilan tanishishning ham o‘ziga xos tajribasi.
Biz “Daryo”ning “Daryo nigohida” ruknida bugun bozorda 15 yildan buyon antikvar buyumlar savdosi bilan shug‘ullanib kelayotgan Abdurashid Madbabayev haqidagi fotojamlanmani taqdim etamiz.
“Yangiobod bozorida 15 yildan buyon savdo bilan shug‘ullanaman. Sobiq ittifoq vaqtida barcha hududlarda to‘garaklar bo‘lar edi. Bu to‘garaklar turli yoshdagi bolalar va o‘smirlarni qamrab olib, ularning bo‘sh vaqtini foydali o‘tkazishlariga ko‘maklashar edi. Musiqa, raqs, teatr, adabiyot, radioelektronika, aviamodel yasash, konstruktorlik, matematika va fizika, futbol, voleybol, gimnastika, suzish, shaxmat kabi sport turlari va hokazo. Men esa ularning orasida fotografiyaga qiziqqanman. Ayniqsa, Zenit TTL kamerasi katta qiziqish uyg‘otgan. O‘sha davrning eng mashhur filmli fotokameralaridan biri. Bu model XX asrning o‘rtalarida foto ixlosmandlari orasida juda ommalashgan edi, nafaqat SSSR, balki xorijda ham keng qo‘llanilgan. Narxi muhandislarning oyligiga deyarli teng, adashmasam, 120 rublga baholangan”.
“Xaridorlarim orasida fotoapparatlarimga qiziqib keladiganlarni 2 toifaga bo‘lish mumkin. Ayrimlari ularni suratga olish, boshqalar esa dekor buyumi sifatida xarid qilishadi. Menga, albatta, fotograflar bilan muloqot qilish qiziqroq. Kameralarimni 200-300 ming so‘mga baholayman, shuning uchun har kim ularni bemalol sotib olishi mumkin. Ularning har birini yillar mobaynida yig‘ganman. Eski davrlarda har bir aholi punktida fotoatelyelar bo‘lgan. Odamlar hujjatlarga aynan ularga borib suratga tushar edi. Shuning uchun aholida hozir ham sandiqlarda eski kameralar saqlanadi.
Men qishloqma-qishloq, hududlar bo‘ylab yurib eski buyumlarni xarid qilaman. Ba’zan esa antikvar buyumlar sotiladigan mahalliy bozorlardan ham olaman. Surxondaryo, Qashqadaryo, vodiy viloyatlaridagi xonadonlardan ko‘p buyumlar xarid qilganman. Xullas bu borada hamma joyda aloqalarim bor”.
“Fotografiya bilan muntazam shug‘ullangan vaqtlarim eng yoqtirgan janrlarimdan biri bu peyzaj edi. Tabiat, tog‘lar va kuz hamda bahor manzaralarini kadrga muhrlashni yoqtirar edim. Tong mahali va kunbotar vaqtlarida, ayniqsa, fotoapparat bilan sayrga chiqish maroqli edi”.
“Yangiobod bozori haqida gapirsam, bu yerga odamlar, asosan, bolaligi, xotiralarini eslash uchun kelishadi. O‘sha damlarga bir zumgina qaytish, lahzalarni jonlantirish uchun. “Buni eslaysanmi? Buni-chi?” kabi savollar bilan iliq tabassumni ko‘raman yuzlarida.
Ayrim ota-onalar ataylab farzandlarini olib kelishadi. Bolalar kattalar yashab o‘tgan umrning bir qismini ko‘rishlarini xohlashadi. Ba’zan kulgili holatlar ham kuzatiladi. Masalan, bir gal bolakay eski telefon apparatini ishlatishni bilmasdan qayerini bosish kerakligini so‘ragandi. Qisqa qilib aytsam, Yangiobod aholi va sayyohlar uchun bepul muzey vazifasini o‘tab kelyapti. Agar sharoit va imkoniyatim bo‘lsa, o‘zim alohida muzey tashkil etgan bo‘lar edim”.
“Bo‘sh vaqtlarimda kitob o‘qishni yoqtirar edim. Hozir ham shunday. Psixologiya yo‘nalishidagi adabiyotlar, ayniqsa, meni o‘ziga jalb qiladi. Teologiya bo‘yicha kitoblar ham katta qiziqish uyg‘otgan. Maktab vaqtlarim ham ta’tilda yangi o‘quv yilida o‘tiladigan mavzularni o‘qib chiqar edim”.
Izoh (0)