Ozarbayjonning Shusha shahrida shaxmat bo‘yicha Vugar Gashimov xotirasiga bag‘ishlangan turnir anʼanaviy musobaqa o‘z yakuniga yetdi.
Musobaqa rapid va blits yo‘nalishlarida o‘tkazilib, g‘olib va sovrindorlar ikki turnirning umumiy natijalari yig‘indisiga ko‘ra aniqlandi.
10-marotaba tashkil etilgan ushbu nufuzli turnirda jami 8 nafar grossmeyster qatnashdi. Ular qatorida Nodirbek Abdusattorov ham bor.
Nodirbek blits bahslarida 10 ochko to‘plab ajoyib natija qayd etdi. Rossiyalik Yan Nepomnyashiy ikkinchi, hindistonlik Aravindh Chitambaram uchinchi o‘rinni band etdi. Rapid bahslarida 8 ochko to‘plagan Nodirbek 4-pog‘onadan joy oldi.
Turnir chempionligi uchun unga bir ochko yetmay qoldi. Nodirbekdan bir ochko ko‘p jamg‘argan Yan Nepomnyashiy 10-yubiley turnir chempioniga aylandi.
Maʼlumot uchun, norvegiyalik Magnus Karlsen turnirning 4 karra g‘olibi hisoblanadi. Shaxriyar Mamedyarov ikki bor chempionlikka erishgan bo‘lsa, Fabiano Karuana (AQSH), Nodirbek Abdusattorov (O‘zbekiston) va Vidit Santosh (Hindiston) bir martadan bosh sovringa ega chiqqan.
Eslatib o‘tamiz, Nodirbek Abdusattorov Butunjahon shaxmat Olimpiadasi yakunlangach Toshkentga qaytgan va aeroportda tashkil etilgan taqdirlash marosimida qatnashgan. Shundan so‘ng, shaxmatchi Bokuga jo‘nab ketgan. Charchoq alomatlariga qaramay o‘zbekistonlik sportchi ajoyib natija qayd etdi.
Ushbu musobaqaning mukofot jamg‘armasi haqida ochiq manbalarda ma’lumot mavjud emas.
Izoh (0)