Nyu Yorkda o‘tkazilayotgan tezkor shaxmat bo‘yicha jahon chempionatida sobiq jahon chempioni, norvegiyalik shaxmatchi Magnus Karlsen kiyinish qoidalarini buzgani uchun diskvalifikatsiya qilindi.
Turnirning ikkinchi kuni, 27-dekabrda Karlsen Xalqaro shaxmat federatsiyasi (FIDE) qoidalari bilan taqiqlangan jinsi shimda keldi. Ogohlantirilib 200 yevro jarimaga tortilgach, Karlsen kiyimini almashtirishdan bosh tortdi, bu esa uning turnirdan chetlashtirilishiga olib keldi.
“Janob Magnus Karlsen ushbu tadbirning amaldagi tartibi bilan qat’iyan taqiqlangan kiyinish qoidalarini buzdi”, deyiladi FIDE rasmiy bayonotida.
Qoidalarga ko‘ra, erkaklarga jinsi shim, sport poyabzali, kepka va quyoshdan himoyalovchi ko‘zoynak taqish taqiqlanadi. Karlsen ertasi kuni kiyimini almashtirishni rejalashtirganini, biroq buni darhol bajarishni talab qilish adolatsizlik ekanini aytdi.
“Men kiyimimni ertasi kuni almashtirishimni aytdim. Tashkilotchilar buning hoziroq bo‘lishi kerakligini aytishdi. Men uchun bu prinsip masalasi — shuning uchun biz bu yerdamiz. Men appelyatsiya topshirmadim. Bu haqda qayg‘urishga qarilik qilaman. Agar ular meni diskvalifikatsiya qilishni istasa, men, yaxshisi, ob-havo yaxshi bo‘lgan joyga borib o‘ynayman”, dedi u.
Chetlatish paytida Karlsen allaqachon yetakchilardan bir yarim ochko ortda qolgan va o‘z unvonini himoya qilish uchun kam imkoniyatga ega edi. Sobiq jahon chempioni blits bo‘yicha jahon chempionatida ishtirok etishdan ham voz kechdi.
Rossiyalik shaxmatchi Yan Nepomnyashiy ham turnirga krossovkada kelib, kiyinish qoidasini buzdi. U 200 dollar jarimaga tortildi. Biroq sportchi poyabzalini almashtirishga rozi bo‘ldi va jahon chempionatidagi ishtirokini davom ettirdi.
Turnirda o‘zbekistonlik shaxmatchilar ham ishtirok etmoqda. Nodirbek Abdusattorov va Javohir Sindorov peshqadamlardan 0,5 ochko ortda borishyapti. G‘oliblik uchun kurashishga imkoniyatlar bor. Ayollar yo‘nalishida Afro‘za Hamdamova peshqadamdan 1 ochko kam to‘plagan holda bahsni davom ettirmoqda.
Izoh (0)