13—17-noyabr kunlari Hindistonning Kalkutta shahrida 6-Tata Steel Chess India turniri bo‘lib o‘tadi.
Ushbu mukofot jamg‘armasi 41500 AQSH dollarini tashkil etadigan turnirda o‘zbekistonlik Nodirbek Abdusattorov ham ishtirok etadi.
Musobaqa rapid va blits yo‘nalishlarida bo‘lib o‘tadi: 9 tur rapid va 18 tur blits.
Ikki yo‘nalishda ham alohida g‘olib aniqlanadi.
Musobaqada Nodirbek Abdusattorovdan tashqari, Magnus Karlsen, Vinsent Keymer, Uesli So, Praggnanandha, Arjun Erigaisi kabi tajribali shaxmatchilar ham qatnashadi.
G‘oliblar quyidagicha mukofotlanadi:
Rapid yo‘nalishida:
- 1-o‘rin 10 ming AQSH dollari;
- 2-o‘rin 6 ming AQSH dollari;
- 3-o‘rin 3 ming AQSH dollari.
Blits yo‘nalishida:
- 1-o‘rin 7,5 ming AQSH dollari;
- 2-o‘rin 4 ming AQSH dollari;
- 3-o‘rin 2,5 ming AQSH dollari.
Bugun, 13-noyabrdan Nodirbek Abdusattorov bahslarga kirishadi. O‘zbekistonlik shaxmatchi FIDE reytingida 6-o‘rinda bormoqda.
Oktyabr oyining so‘nggi kunlarida Londonda shaxmat bo‘yicha WR Chess Masters musobaqasi bo‘lib o‘tdi. Dastlabki bosqichda Aleksandra Kostenyuk bilan o‘yinda g‘alaba qozongan Nodirbek Abdusattorov chorak finalda fransiyalik Maksim Vashe-Lagrav bilan bahsda mag’lub bo‘lib, musobaqani erta yakunladi.
3—12-oktyabr kunlari Buyuk Britaniyaning London shahrida bo‘lib o‘tgan turnirda Nodirbek Alaskan Knights jamoasi nomidan qatnashdi va turnirni ikkinchi o‘rinda tugatdi.
Izoh (0)