Bu haqda Samarqandda bo‘lib o‘tgan jahon chempionatiga tashrif buyurgan xorijlik sportchilar taklif bergan.
2023-yilning 26—30-dekabr kunlari ilk bor Samarqandda shaxmatning rapid va blits turlari bo‘yicha jahon chempionati bo‘lib o‘tdi. Besh kun davom etgan turnirda rapid va blits bo‘yicha jahon chempionligi uchun kurash olib borildi. Chempionatda dunyoning eng yaxshi shaxmatchilari ishtirok etdi. Vaziyatdan foydalanib, sportchilarga “shaxmat+” o‘yini haqida ma’lumot berdik, targ‘ibotini olib bordi, — deydi Alijon Isoqov.
Xonandaning aytishicha, xorijlik sportchilar “shaxmat+” o‘yinining maxsus doskasida o‘ynab ko‘rib, o‘yin imkoniyatlarini bilgach, o‘zlari istiqomat qiluvchi mamlakatlardagi shaxmat maktablarida uni o‘qitish tashabbusini ilgari surgan.
Turli mamlakatlardan kelgan mehmonlarimiz “shaxmat+”ni o‘ynab ko‘rib, o‘yin juda ham qiziqarli va ko‘p o‘ylab yurishni taqozo etishini bildirishdi. Shu sabab o‘yinni o‘zlari istiqomat qiluvchi mamlakatlardagi shaxmat maktablarida o‘rgatish tashabbusi bilan chiqdi, — deydi o‘yin muallifi.
Alijon Isoqovning ta’kidlashicha, xorijlik sportchilarga “shaxmat+” o‘yini uchun yasalgan maxsus doskalar sovg‘a qilingan.
Alijon Isoqovning “Daryo”ga qo‘shimcha qilishicha, yaqin kunlarda Amir Temur ordenli Shahrisabz shahrida “shaxmat+” o‘yini bo‘yicha Qashqadaryo viloyati hokimligi tashabbusi bilan O‘zbekiston chempionati ham bo‘lib o‘tadi.
Qashqadaryo viloyatida tug‘ilgan xonanda Alijon Isoqov uch ming yillik tarixga ega shaxmat o‘yiniga qo‘shimcha kiritib, yangi o‘yinni “shaxmat+” deb atadi va mualliflikni patentlagandi.
Shaxmat o‘yiniga juda qiziqaman, oilaviy ko‘p o‘ynaymiz. 90 yoshni qarshilagan hoji otam, akalarim, ukalarim, jiyanlar — hammamiz yig‘ilishib, musobaqa ham uyushtirib turamiz. Tarixga qiziqishim va o‘rganishim davomida sohibqiron bobomiz Amir Temur janglarida qo‘shinlarining ta’minotiga alohida yondashganiga e’tibor berdim.
Agar shaxmat o‘yinini jang maydoni deb tasavvur qilsak, nega unda ta’minotchi tosh yo‘q? Havaskor sifatida shaxmatga 8 ta ta’minotchi tosh qo‘shdim va shaxmat doskasini kattalashtirdim. Bunga ikki yildan oshdi, shaxmatga qiziqadigan odamlar bilan o‘ynab ko‘rdim. Keyin ular juda qiziq va mukammal o‘yin bo‘libdi, ommaga joriy qilsa bo‘lar ekan, degan taklifni berishdi, — degandi o‘yinni kashf qilgan xonanda.
Izoh (0)