O‘zbekistonlik grossmeyster Nodirbek Abdusattorov (2731) Niderlandiyada bo‘lib o‘tayotgan Tata Steel Chess 2023 musobaqasida Magnus Karlsenni (2846) mag‘lubiyatga uchratdi.
Abdusattorov FIDE reytingidagi ochkolari sonini 2731 ga yetkazdi va bu borada O‘zbekiston shaxmati tarixidagi eng yaxshi natijani qayd etdi. Nodirbek Rustam Qosimjonovning (2678) ko‘rsatkichini yangiladi. Qosimjonov 2015-yilda 2715 natija qayd etgandi.
Karlsen mazkur musobaqa doirasidagi ikkinchi mag‘lubiyatini qabul qilib oldi. Avvalroq norvegiyalik grossmeyster Anish Kumar Giriga yutqazib qo‘ygandi. Amaldagi jahon chempioni 2015-yildan keyin ilk bor bir musobaqa doirasida ikki marta yutqazdi.
Abdusattorov musobaqada beshta turda 4 ochko to‘plagan holda peshqadam bo‘lib turibdi. 20-yanvar kuni 18 yoshli o‘zbekistonlik shaxmatchi 3 ochko bilan uchinchi o‘rinda borayotgan Hindiston vakili Rameshbabu Praggnanadhaga (2684) qarshi dona suradi.
Izoh (0)