“Daryo” nashri 20-yanvarda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Rossiya Turkmaniston biznesi uchun ochiq, ayni paytda Putin Qozog‘iston prezidenti bilan energetik hamkorlikni muhokama qilmoqda
Rossiya bosh vaziri Mixail Mishustin 19-yanvar kuni Turkmaniston-Rossiya forumida qatnashish uchun ishchi tashrif bilan Ashxobodga keldi, deb yozadi “Kommersant”.
U ikki tomonlama hamkorlikning asosiy yo‘nalishlarini belgilar ekan, xususan, ayni paytda bor-yo‘g‘i 1 milliard dollarga baholanayotgan tovar aylanmasini kengaytirish zarurligini qayd etdi.
Mishustin ta’kidlashicha, Moskva va Ashxobod o‘rtasidagi hamkorlikni rivojlantirishda hozirgi “nostandart sharoitlarda” yangi imkoniyatlar mavjud: Turkmaniston biznesi Rossiya bozorida u yerni G‘arb kompaniyalari tark etganidan keyin “bo‘shab qolgan” ba’zi joylarni egallashi mumkin.
O‘z navbatida, Rossiya Iqtisodiyot vazirligi ma’lumotlariga ko‘ra, ayni paytda Rossiya biznesi Turkmanistonda jami 3,5 milliard dollarlik 20 ta investitsiya loyihalarida qatnashmoqda.
So‘nggi ma‘lumotlarga ko‘ra Putin Qozog‘iston prezidenti Qosim Jo‘mart To‘qayev bilan qo‘ng‘iroqlashgan va unda energetika sohasidagi hamkorlikni muhokama qilgan.
Ukraina G‘arbning harbiy yordamiga yana qancha vaqt umid qilishi mumkin?
AQSH Markaziy razvedka boshqarmasi rahbari Uilyam Berns o‘tgan hafta Kiyevga yashirincha tashrif buyurgan va Ukraina prezidenti Vladimir Zelenskiy bilan uchrashgan, deb yozmoqda The Washington Post o‘z manbalariga tayanib.
Uchrashuvda Berns “Rossiyaning yaqin haftalar va oylardagi harbiy rejalari bo‘yicha” o‘z taxminlarini Zelenskiy bilan bo‘lishgan.
Nashr ma’lumotlariga ko‘ra, Zelenskiy va uning ma’muriyati AQSH Kongressining Vakillar palatasi respublikachilar nazoratiga o‘tgani munosabati bilan Ukraina G‘arbning harbiy yordamiga yana qancha vaqt umid qilishi mumkinligidan xavotir bildirgan.
Berns qaysidir nuqtada yordam ko‘rsatish qiyinroq bo‘lishini tan oldi, deydi nashr manbalari.Ammo razvedka boshqarmasi rahbari Zelenskiy va uning yordamchilarini AQSH Ukrainani qo‘llab-quvvatlashga sodiq qolgani va dekabr oyida Kongress tomonidan Kiyevga ma’qullangan 45 milliard dollarlik yordam paketi kamida iyul yoki avgustgacha davom etishiga ishontirgan.
Xabarda aytilishicha, muzokaralar chog‘ida Berns “jang maydonidagi hozirgi lahzaning muhimligini ta’kidlagan”.
Ayni vaziyatda AQSH Ukrainaga yangi yordam paketini ajratdi, unga Bradley va Stryker zirhli mashinalari kiritilgan
Germaniyaning Ukrainaga tank yetkazishda ikkilanayotgani uning tarixi bilan bog‘liq
Ukraina prezidenti Vladimir Zelenskiy tanklar tufayli Germaniya kanslerini “siyosiy irodasizlik”da aybladi
Bloomberg nashrining Germaniya vitse-kansleri Robert Xabekka tayanib bergan xabarida bu masala quyidagicha ochiqlandi:Berlin uchun Ukrainaga tank yetkazib berish AQSH ham shunday qilgan taqdirdagina osonroq bo‘ladi, bunga sabab — Germaniyaning o‘tmishi.
“Bizning tariximizni yaxshi bilasiz, biz muayyan sabablarga ko‘ra, bu narsalarni (harbiy texnika yetkazib berishni) boshqalarga qaraganda ko‘proq istamaymiz”, — deb tushuntirdi Xabek.
Shu bilan birga, Oq uy Germaniyaning pozitsiyasida mantiq ko‘rmayapti, chunki nemis “Leopard” tanklari Ukrainaga Amerikaning Abrams tanklaridan ertaroq yetib borishi mumkin, Ukraina harbiylari esa ularni qanday boshqarishni tezroq o‘rganadi, dedi Bloomberg’ning AQSH prezidenti ma’muriyatidagi manbalari.
“Ular bizni qiyin ahvolga solib qo‘yishdi”, — dedi Bayden ma’muriyatining yuqori martabali amaldori CNN nashriga. Uning fikricha, Berlin o‘z pozitsiyasini o‘zgartiradiganga o‘xshamayapti.
O‘zbekiston shaxmat tarixida Rustam Qosimjonovni rekordini yangilagan Nodirbek Abdusattorov o‘zbek intellektini dunyoga ko‘rsatmoqda
O‘zbekistonlik grossmeyster Nodirbek Abdusattorov (2731) Niderlandiyada bo‘lib o‘tayotgan Tata Steel Chess 2023 musobaqasida Magnus Karlsenni (2846) mag‘lubiyatga uchratdi.
Abdusattorov FIDE reytingidagi ochkolari sonini 2731 ga yetkazdi va bu borada O‘zbekiston shaxmati tarixidagi eng yaxshi natijani qayd etdi. Nodirbek Rustam Qosimjonovning (2678) ko‘rsatkichini yangiladi. Qosimjonov 2015-yilda 2715 natija qayd etgandi.
Amaldagi jahon chempioni Magnus Karlsen mazkur musobaqa doirasidagi ikkinchi mag‘lubiyatini qabul qilib oldi. Avvalroq u norvegiyalik grossmeyster Anish Kumar Giriga yutqazib qo‘ygandi.
Abdusattorov musobaqada beshta turda 4 ochko to‘plagan holda peshqadam bo‘lib turibdi. 20-yanvar kuni 18 yoshli o‘zbekistonlik shaxmatchi 3 ochko bilan uchinchi o‘rinda borayotgan Hindiston vakili Rameshbabu Praggnanadhaga (2684) qarshi dona suradi.
Izoh (0)