Polsha poytaxti Varshava shahrida bo‘lib o‘tgan Superbet Poland 2024 turniri yakunlandi. Unda o‘zbekistonlik grossmeyster Nodirbek Abdusattorov ham ishtirok etdi.
Superbet Poland 2024 turnirining sovrin jamg‘armasi 175 ming dollarni tashkil etdi. Hozirgi kunda dunyoning birinchi shaxmatchisi bo‘lib turgan Magnus Karlsen musobaqada g‘alaba qozondi. Magnus rapid hamda blits bahslaridan so‘ng 26 ochko to‘plab, musobaqa g‘olibligi hamda 40 ming dollarga ega chiqdi.
Dunyoning eng kuchli shaxmatchilari qatnashgan musobaqada Nodirbek Abdusattorov ham yaxshi ishtirok etdi. Rapid bahslarini o‘zbekistonlik shaxmatchi 8 ochko bilan 7-o‘rinda yakunladi.
18 turdan iborat blits bahslari ham qiziqarli va o‘ta kurashlarga boy o‘tdi. Nodirbek Abdusattorov blits bahslarida 9.5 ochko to‘plashga muvaffaq bo‘ldi. E’tiborlisi, o‘zbekistonlik shaxmatchi blits bahslarining birinchisida Magnus Karlsendan ustun keldi. Norvegiya vakili ikkinchi bahsda Nodirbek Abdusattorovni mag‘lub etdi.
Shu tariqa Nodirbek Abdusattorov musobaqani 17.5 ochko to‘plab 6-o‘rinda yakunladi. Shu bilan birga O‘zbekistonning birinchi raqamli shaxmatchisi 11ming AQSH dollari pul mukofotiga ham ega chiqdi.
Eslatib o‘tamiz, Nodirbek Abdusattorov Shvetsiyaning Malmo shahrida bo‘lib o‘tgan Tepe Sigeman 2024 turnirida g‘olib bo‘lgan edi.
Izoh (0)