Нью Йоркда ўтказилаётган тезкор шахмат бўйича жаҳон чемпионатида собиқ жаҳон чемпиони, норвегиялик шахматчи Магнус Карлсен кийиниш қоидаларини бузгани учун дисквалификация қилинди.
Турнирнинг иккинчи куни, 27 декабрда Карлсен Халқаро шахмат федерацияси (FIDE) қоидалари билан тақиқланган жинси шимда келди. Огоҳлантирилиб 200 евро жаримага тортилгач, Карлсен кийимини алмаштиришдан бош тортди, бу эса унинг турнирдан четлаштирилишига олиб келди.
“Жаноб Магнус Карлсен ушбу тадбирнинг амалдаги тартиби билан қатъиян тақиқланган кийиниш қоидаларини бузди”, дейилади FIDE расмий баёнотида.
Қоидаларга кўра, эркакларга жинси шим, спорт пойабзали, кепка ва қуёшдан ҳимояловчи кўзойнак тақиш тақиқланади. Карлсен эртаси куни кийимини алмаштиришни режалаштирганини, бироқ буни дарҳол бажаришни талаб қилиш адолатсизлик эканини айтди.
“Мен кийимимни эртаси куни алмаштиришимни айтдим. Ташкилотчилар бунинг ҳозироқ бўлиши кераклигини айтишди. Мен учун бу принцип масаласи — шунинг учун биз бу ердамиз. Мен аппеляция топширмадим. Бу ҳақда қайғуришга қарилик қиламан. Агар улар мени дисквалификация қилишни истаса, мен, яхшиси, об-ҳаво яхши бўлган жойга бориб ўйнайман”, деди у.
Четлатиш пайтида Карлсен аллақачон етакчилардан бир ярим очко ортда қолган ва ўз унвонини ҳимоя қилиш учун кам имкониятга эга эди. Собиқ жаҳон чемпиони блиц бўйича жаҳон чемпионатида иштирок этишдан ҳам воз кечди.
Россиялик шахматчи Ян Непомняший ҳам турнирга кроссовкада келиб, кийиниш қоидасини бузди. У 200 доллар жаримага тортилди. Бироқ спортчи пойабзалини алмаштиришга рози бўлди ва жаҳон чемпионатидаги иштирокини давом эттирди.
Турнирда ўзбекистонлик шахматчилар ҳам иштирок этмоқда. Нодирбек Абдусатторов ва Жавоҳир Синдоров пешқадамлардан 0,5 очко ортда боришяпти. Ғолиблик учун курашишга имкониятлар бор. Аёллар йўналишида Афрўза Ҳамдамова пешқадамдан 1 очко кам тўплаган ҳолда баҳсни давом эттирмоқда.
Изоҳ (0)