Mustaqil xalqaro ekspertlar Rossiyani BMTning genotsid haqidagi konvensiyasini buzishda aybladi

Rossiya Ukrainada urush olib borish orqali genotsidga gijgijlamoqda va ukrain xalqini yo‘q qilishga qaratilgan harakatlarni amalga oshirmoqda. Bu haqda Amerikaning New Lines Institute for Strategy and Policy va Kanadaning Raul Vallenberg nomidagi Inson huquqlari bo‘yicha markazi ma’ruzasida aytiladi, deb yozadi Meduza.

Ma’ruzani yozishda 30 nafar yetakchi huquqshunos va genotsid bo‘yicha ekspertlar qatnashdi. Ular Rossiya BMTning Genotsid jinoyati oldini olish va uning uchun jazolar haqidagi konvensiyasining ikkinchi va uchinchi moddalarini buzgani haqidagi xulosaga keldi.

Ma’ruzada ta’kidlanishicha, ayblovlar tinch aholining ommaviy o‘ldirilishi, zo‘ravonlik yordamidagi deportatsiyalar va Ukrainaga qarshi safsatalar kabi dalillar bilan mustahkamlanadi. Dalillardan biri sifatida Rossiya prezidenti Vladimir Putinning Ukraina davlat sifatida mavjud bo‘lish huquqiga ega emasligi haqidagi gaplari keltiriladi.

Ma’ruza mualliflari Ukrainadagi vaziyatni Srebrenitsadagi qirg‘inga qiyoslab, dunyo yetakchilarini kech bo‘lmasidan Rossiyaga ta’sir o‘tkazishga chaqirmoqda. Bu urush boshidan beri Ukrainadagi genotsid haqida tayyorlangan birinchi mustaqil ma’ruzadir.

Rossiyaning Ukrainadagi xatti-harakatlarini Estoniya, Latviya va Kanada parlamentlari rasman genotsid deb tan olgan. AQSH prezidenti Jo Bayden ham hodisalarni xuddi shu atama bilan ta’riflagan va yuridik jihatdan bahoni tegishli ekspertlar berishi kerakligini ta’kidlagan.

New Lines Institute for Strategy and Policy va Raul Vallenberg nomidagi Inson huquqlari bo‘yicha markaz avvalroq Xitoyning Shinjon viloyatidagi va Myanmadagi genotsid haqida ma’ruzalar tayyorlagan edi.