Uzbek Forum nodavlat huquqni himoya qilish tashkiloti O‘zbekistonning paxta va to‘qimachilik mahsulotlarini xarid qilish jarayonida kompaniyalar duch keladigan muammo va xavflar haqida yangi hisobot eʼlon qildi.
Hisobotda asosiy eʼtibor Germaniya kompaniyalariga va ularning taʼminot zanjirlarida inson huquqlariga rioya etish majburiyatlariga qaratilgan.
Uzbek Forumʼning 12-dekabrdagi hisobotida “Inson huquqlariga rioya etilishini tekshirish: O‘zbekiston to‘qimachilik sohasida Germaniya kompaniyalari duch keladigan xavflarni baholash” hisobotidan bir qator asosiy xulosalar keltirilgan.
Taʼkidlanishicha, O‘zbekistonda davlat tomonidan o‘rnatilgan tizimli majburiy mehnatga barham berilgan so‘nggi islohotlarga qaramay, ba’zi xavf-xatarlar saqlanib qolmoqda.
"O‘zbekistonda paxta sohasida majburiy mehnat va boshqa huquqbuzarliklar xavfi hamon yuqori darajada qolmoqda" deyiladi hisobotda.
"Shu bilan birga, kompaniyalar tomonidan oshkor qilingan maʼlumotlar shuni ko‘rsatadiki, ular endi O‘zbekistondan xarid qilishda majburiy mehnat yoki boshqa huquqbuzarliklarni xavf sifatida ko‘rmaydi va bu xavflarni aniqlash, oldini olish, yumshatish hamda bartaraf etish bo‘yicha chora-tadbirlar haqida maʼlumotlarga ega emas.
Bundan tashqari, kompaniyalar inson huquqlariga asoslangan tekshiruv yondashuvini joriy etishlari lozim. Bu yondashuv mamlakatda vaziyatni, ayniqsa birlashish erkinligi, so‘z erkinligi va fuqarolik jamiyati faoliyatiga, shu jumladan, mustaqil monitoringga nisbatan mavjud cheklovlarni hisobga olishi kerak", – deyiladi hisobotda.
Qo‘shimcha qilinishicha, kompaniyalar taʼminot zanjirining barcha bosqichlarida to‘liq muvofiqlikni taʼminlash va kuzatuvchanlikni yaxshilash uchun xomashyo darajasigacha bo‘lgan o‘z taʼminot zanjirlari haqidagi maʼlumotlarni xaritalash va oshkor qilishga qo‘shimcha sarmoya kiritishi lozim.
Izoh (0)