Xitoyning Shanxay shahrida 5-10-noyabr kunlari yettinchi Xitoy xalqaro import mahsulotlari ko‘rgazmasi bo‘lib o‘tadi. Bu haqda O‘zbekiston bosh vaziri matbuot xizmati xabar berdi.
Maʼlum qilinishicha, tadbirda faxriy mehmon maqomida ishtirok etish uchun Abdulla Aripov boshchiligidagi O‘zbekiston hukumati delegatsiyasi 4-noyabr kuni Shanxayga tashrif buyurdi.
Tashrif doirasida Xitoy Xalq Respublikasi Davlat kengashi bosh vaziri Li Syan bilan uchrashuv o‘tkazildi.
O‘zbekiston tomoni Shavkat Mirziyoyevning Xitoy Xalq Respublikasi raisi Si Szinpinga yo‘llagan samimiy salomini yetkazdi.
Uchrashuvda savdo-iqtisodiy hamkorlik rivojlanib borayotgani qayd etildi. Xususan, 2023-yilda savdo aylanmasi 14 mlrd dollarga yetdi.
Ikki davlat rahbarlari hukumatlar zimmasiga uning hajmini 20 mlrd dollarga yetkazish vazifasini qo‘ygan. Mazkur topshiriq ijrosini taʼminlashda barcha imkoniyatlar mavjudligi, buning uchun esa o‘zaro saʼy-harakatlari birlashtirish lozimligi bildirildi.
Uchrashuvda savdo-iqtisodiy, investitsiyaviy, moliyaviy, sanoat, infratuzilma, transport-logistika, “yashil” energetika, tog‘-kon sanoati, qishloq xo‘jaligi, to‘qimachilik, IT, taʼlim, turizm, hududlararo va madaniy-gumanitar hamkorlikni rivojlantirish masalalari yuzasidan ham atroflicha fikr almashildi.
Shanxayga tashrif doirasida Shanxay shahri Partiya qo‘mitasi kotibi Chen Szinin hamda “Henan investment Group”, “China Datang Group”, “Shanxi Tianhai Group” singari Xitoyning yirik kompaniyalari rahbariyati bilan ham uchrashuvlar o‘tkazildi.
Izoh (0)