Jizzax viloyatidagi “Jizzax industrial to‘qima” MCHJ paxta to‘qimachilik klasteri tomonidan paxta tolasi va texnik chigit mahsulotlarini to‘g‘ridan to‘g‘ri shartnomalar asosida sotilganligi aniqlandi. Bu haqda Raqobat qo‘mitasi xabar bermoqda.
Aytilishicha, klaster 321,7 tonna paxta tolasini birja kotirovka narxlariga nisbatan yuqori narxlarda va 1021 tonna paxta tolasini birja kotirovka narxlariga nisbatan past narxlarda sotgan. Shuningdek, 2536 tonna texnik chigit mahsuloti birja kotirovka narxlari bilan solishtirilganda past narxlarda sotilganligi ma’lum bo‘lgan.
Qonunchilikka muvofiq, “Jizzax industrial to‘qima” MCHJga nisbatan ish qo‘zg‘atilib, natijasi yuzasidan belgilangan tartibda tegishli ta’sir chorasi qo‘llanilgan.
O‘rganishlar vaqtida paxta shroti bo‘yicha birja savdolarida ishtirok etgan “Paxtakor sifat yog‘”, “Jizzax kenteks” va “Baxmal quyosh nuri” jamiyatlar tomonidan narxlarni kelishgan holda keskin oshirganlik alomatlari mavjudligi aniqlangan. Ularga nisbatan Maxsus komissiya tomonidan ish qo‘zg‘atilib, jamiyatlarning mansabdor shaxslariga nisbatan ma’muriy bayonnomalar rasmiylashtirildi.
Izoh (0)