Uzbek Forum нодавлат ҳуқуқни ҳимоя қилиш ташкилоти Ўзбекистоннинг пахта ва тўқимачилик маҳсулотларини харид қилиш жараёнида компаниялар дуч келадиган муаммо ва хавфлар ҳақида янги ҳисобот эълон қилди.
Ҳисоботда асосий эътибор Германия компанияларига ва уларнинг таъминот занжирларида инсон ҳуқуқларига риоя этиш мажбуриятларига қаратилган.
Uzbek Forum'нинг 12 декабрдаги ҳисоботида “Инсон ҳуқуқларига риоя этилишини текшириш: Ўзбекистон тўқимачилик соҳасида Германия компаниялари дуч келадиган хавфларни баҳолаш” ҳисоботидан бир қатор асосий хулосалар келтирилган.
Таъкидланишича, Ўзбекистонда давлат томонидан ўрнатилган тизимли мажбурий меҳнатга барҳам берилган сўнгги ислоҳотларга қарамай, баъзи хавф-хатарлар сақланиб қолмоқда.
"Ўзбекистонда пахта соҳасида мажбурий меҳнат ва бошқа ҳуқуқбузарликлар хавфи ҳамон юқори даражада қолмоқда" дейилади ҳисоботда.
"Шу билан бирга, компаниялар томонидан ошкор қилинган маълумотлар шуни кўрсатадики, улар энди Ўзбекистондан харид қилишда мажбурий меҳнат ёки бошқа ҳуқуқбузарликларни хавф сифатида кўрмайди ва бу хавфларни аниқлаш, олдини олиш, юмшатиш ҳамда бартараф этиш бўйича чора-тадбирлар ҳақида маълумотларга эга эмас.
Бундан ташқари, компаниялар инсон ҳуқуқларига асосланган текширув ёндашувини жорий этишлари лозим. Бу ёндашув мамлакатда вазиятни, айниқса бирлашиш эркинлиги, сўз эркинлиги ва фуқаролик жамияти фаолиятига, шу жумладан, мустақил мониторингга нисбатан мавжуд чекловларни ҳисобга олиши керак", – дейилади ҳисоботда.
Қўшимча қилинишича, компаниялар таъминот занжирининг барча босқичларида тўлиқ мувофиқликни таъминлаш ва кузатувчанликни яхшилаш учун хом ашё даражасигача бўлган ўз таъминот занжирлари ҳақидаги маълумотларни хариталаш ва ошкор қилишга қўшимча сармоя киритиши лозим.
Изоҳ (0)