Toshkent shahar Yangi Toshkent hududidan to‘qimachilik mahsulotlari faoliyati bilan shug‘ullanish uchun 2,7 gektar sotuvga qo‘yilgan. Bu haqda Davlat aktivlarini boshqarish agentligi axborot xizmati xabar bermoqda.
Auksion savdosida yerning boshlang‘ich narxi 13,5 milliard so‘m deb belgilangan. O‘sib borish tartibidagi savdoda “O‘zguven Mimarlik Inshaat” xususiy korxonasi 25,7 milliard so‘m bilan g‘olib bo‘lgan.
Yer uchastkasiga bo‘lgan huquq turi ijara, mahalliy ishtirokchilarga 49 yil muddatga, chet ellik ishtirokchilarga 24 yil muddatga beriladi. Undan foydalanish mumkin bo‘lgan faoliyat turlari — 80 foiz turar joy, 20 foiz noturar. Loyiha bo‘yicha direksiya bilan kelishiladi.
Qurilishi rejalashtirilgan obyektga 43 million dollar investitsiya kiritish ko‘zda tutilgan. Ruxsat etilgan obyektlardan boshqa maqsadlarda foydalanish taqiqlanadi.
Avvalroq Yangi Toshkent shahri qurilishi uchun Toshkent viloyatidan yana yer ajratilgani ma’lum qilingan edi.
Ma’lumot uchun, 2023-yilning mart oyida Yangi Toshkent shahrining qurilishiga tamal toshi qo‘yilgan edi. 2024-yil aprelida bu yerda ilk inshootlar qurilishini boshlash marosimi bo‘ldi.
2023-yilning iyulida “Yangi Toshkent shahrini barpo etish chora-tadbirlari to‘g‘risida”gi prezident qarori qabul qilingan. 500 ming aholiga mo‘ljallangan Yangi Toshkent shahri Chirchiq va Qorasuv daryolari oralig‘ida barpo etiladi. Yangi Toshkent loyihasini amalga oshirish uchun tanlab olingan hudud — dengiz sathidan 500 metr baland bo‘lib, shaharga yaqinligi, o‘z iqlimi, bahavoligi va ikki daryo o‘rtasida joylashgani bilan noyob hisoblanadi.
Davlat rahbari 2023-yil sentyabrida Yangi Toshkent shahrining bosh rejasi loyihasi bilan tanishganida Yangi Toshkent “aqlli” va “bog‘ shahar” bo‘lishini aytgandi. Davlat idoralari bosqichma-bosqich Yangi Toshkentga ko‘chib boradi.
Izoh (0)