Ikki hududda fuqarolarni AQSH va Polshaga ishga yuborishni vaʼda qilgan shaxslar ushlandi
Toshkent shahrining Mirzo Ulug‘bek hamda Navoiy viloyatining Xatirchi tumanlarida fuqarolarni xorijiy davlatlarga ishga yuborishni vaʼda qilgan shaxslar ushlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Foto: Bosh prokuratura huzuridagi Iqtisodiy jinoyatlarga qarshi kurashish departamenti
Maʼlum qilinishicha, Mirzo Ulug‘bek tumanida fuqaro A.N. fuqaro S.X.ning ishonchiga kirib, unga go‘yoki yuqori lavozimda ishlovchi tanishlari orqali Amerika Qo‘shma Shtatlariga ishga yuborishni vaʼda qilgan.
Buning evaziga 21 ming dollar berishi kerakligini aytib, shundan 9 ming dollarni olgan vaqtida ushlangan.
Shuningdek, Xatirchi tumanida fuqaro M. fuqaro SH.ni Polshaga ishga yuborishi evaziga 1 ming dollar va 6,3 mln so‘mni olgan vaqtida ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Noqonuniy tarzda xorijga ishga yuborish
Avvalroq, Davlat xavfsizlik xizmati Buyuk Britaniyaga ishga yuborish uchun to‘rt kishidan 12 ming dollar olgan shaxs ushlangani haqida xabar bergandi.
Shu kabi holat Toshkent shahrida ham kuzatilgandi. 3 nafar fuqaroni tanishlari yordamida Buyuk Britaniyaga ishga yuborishi va viza olib berishi evaziga 12 000 AQSH dollar olgan fuqaro qo‘lga tushgandi.
Bundan avval Toshkentda fuqaroni Yaponiyaga ishga jo‘natish evaziga 7,4 ming dollar olgan shaxs, Samarqandda to‘rt kishini Polshaga ishga yuborishi evaziga jami 10 700 dollarni firibgarlik yo‘li bilan qo‘lga kiritgan shaxsga jinoyat ishi qo‘zg‘atilgandi. Samarqand, Jizzax va Toshkentda fuqarolarni xorijga ishga yuborishni vaʼda qilgan shaxslar ushlangandi.
Prezidentning “Xorijda mehnat faoliyatini amalga oshirish jarayonlarini tartibga solish bo‘yicha qo‘shimcha chora-tadbirlar to‘g‘risida”gi qarori qabul qilingan bo‘lib, unga ko‘ra 2024-yil 1-noyabrdan xorijiy ish beruvchilar tomonidan taklif qilinayotgan ish o‘rinlari haqidagi barcha maʼlumotlar Migratsiya agentligining elektron platformasi, OAV va ijtimoiy tarmoqlarda ochiq eʼlon qilib boriladi.
Izoh (0)