Toshkentda 3 kishini chet elga ishga yuborishini aytib firibgarlik qilgan shaxs ushlandi.
Bosh prokuratura huzuridagi departamentning Uchtepa tumani bo‘limi, DXX va IIV xodimlari hamkorligida o‘tkazilgan tezkor tadbirda fuqaro S.U. fuqaro D.N. va boshqalarning ishonchiga kirib, 3 nafar fuqaroni tanishlari yordamida Buyuk Britaniyaga ishga yuborishi va viza olib berishi evaziga 12 000 AQSH dollarni olgan vaqtda ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Bundan avval Toshkentda fuqaroni Yaponiyaga ishga jo‘natish evaziga 7,4 ming dollar olgan shaxs, Samarqandda to‘rt kishini Polshaga ishga yuborishi evaziga jami 10 700 dollarni firibgarlik yo‘li bilan qo‘lga kiritgan shaxsga jinoyat ishi qo‘zg‘atilgandi. Samarqand, Jizzax va Toshkentda fuqarolarni xorijga ishga yuborishni vaʼda qilgan shaxslar ushlangandi.
Prezidentning “Xorijda mehnat faoliyatini amalga oshirish jarayonlarini tartibga solish bo‘yicha qo‘shimcha chora-tadbirlar to‘g‘risida”gi qarori qabul qilingan bo‘lib, unga ko‘ra 2024-yil 1-noyabrdan xorijiy ish beruvchilar tomonidan taklif qilinayotgan ish o‘rinlari haqidagi barcha maʼlumotlar Migratsiya agentligining elektron platformasi, OAV va ijtimoiy tarmoqlarda ochiq eʼlon qilib boriladi.
Izoh (0)