“… Xafa bo‘lma, uning kasali shaharning kasali, sen qishloqning do‘xtirisan”. Ajoyib kinoasar – “Kichkina tabib” filmidagi ushbu samimiy yupatish esingizda bo‘lsa kerak. Ehtimol, bu gapni eslab, yuzingizga kulgi ham yugurgandir.
O‘zbekistondan xorijga borib, u yerda transmilliy kompaniyalar, yirik startap-u, global brendlarda mutaxassis bo‘lish yo‘lida qiyinchiliklar bo‘lishi tabiiy.
Uzoq yillar davomida shunday qiyinchiliklar ro‘yxatida eng og‘iri O‘zbekiston va rivojlangan dunyo iqtisodiyotlari o‘rtasidagi farq bo‘lib kelgan. Go‘yo, bizning mutaxassislar qishloqning do‘xtiri-yu, xorijiy ish beruvchilarga shaharga xos davo kerakdek.
Bugun Amerika Qo‘shma Shtatlaridagi data tahlili bo‘yicha eng muvaffaqiyatli startaplar sirasiga kiruvchi Axtria kompaniyasida yetakchi analitik bo‘lib ishlayotgan Sherzod Esanov – ana shu g‘ovni yorib o‘ta olgan qahramonlardan biri. Axir, u ko‘p hamkasblari kabi Amerikada emas, Jizzax viloyatining G‘allaorol tumanida tug‘ilib o‘sgan, keyinchalik Toshkentga ko‘chib, maktabni shu yerda tamomlagan. Dunyoning eng rivojlangan mamlakatidagi biror universitetda emas, odatda mahalliy mehnat bozori uchun kadr tayyorlaydigan Toshkent moliya institutida tahsil olgan.
Hammasi institutda moliyaviy tahlil hamda biznes jarayonlarni avtomatlashtirish, zamonaviy texnologiyalar orqali ushbu yo‘nalishlarda inson omilini kamaytirish ustida ishlashga qiziqishdan boshlangan.
“Bakalavriatni tamomlashim O‘zbekistonda dunyoga ochilish va ko‘p sohalar bo‘yicha islohotlar amalga oshirila boshlagan davrga to‘g‘ri keldi”, deydi Sherzod. – “Eng yuqori minbarlardan xususiylashtirish, davlat ulushi bor kompaniyalarni optimizatsiya qilish va xususiy sektorga topshirishga tayyorlanish, hatto IPOga olib chiqish masalalari ko‘tarila boshlandi. Albatta, bunda barcha kompaniyalarning hisobotlari shaffofligini talab qilinardi. Shuning uchun men Moliyaviy Hisobotning Xalqaro Standartlari (IFRS) bo‘yicha sertifikatsiya kursidan o‘tib chiqdim”.
Ingliz tilini aʼlo darajada biladigan, mamlakatning yetakchi kompaniyalar ehtiyoj sezayotgan yo‘nalishda malakaga ega bo‘lgan noyob kadrni O‘zbekistonda maishiy texnika ishlab chiqaruvchi gigant Artel darrov ishga oladi. Artelda moliyaviy tahlil bo‘yicha faoliyat yuritib, tez orada abonentlari soni bo‘yicha mamlakatda yetakchi bo‘lgan Beeline Uzbekistanʼga taklif qilinadi.
Nyu-Yorkdagi NASDAQ birjasida kotirovka qilinadigan VEON kompaniyasiga qarashli Beeline Uzbekistanʼda u Moliyaviy hisobotlarning xalqaro standardlari bo‘yicha yetakchi mutaxassis, moliyaviy tahlilchi bo‘lib ishlaydi.
“Moliyaviy hisobotlarning xalqaro standardlari bo‘yicha olgan bilimlarim amaliy jihatdan mustahkamlanishiga bu korxona juda katta ro‘l o‘ynagan” deydi qahramonimiz.
Qahramonimiz nafaqat moliya, balki biznes jarayonlarning turli bosqich va komponentlarida o‘zining texnik ekspertizasini hayotga tatbiq etgan:
Katta-katta departamentlarning o‘zaro muvofiqlikda ishlashiga xizmat qiladigan Enterprise Resource Planning (ERP) axborot tizimini takomillashtirish ustida ishlayapmiz. Bu tizimni yo‘lga qo‘yish uchun bizga Pokiston va Ukrainadan, shuningdek, Amsterdamdagi bosh qarorgohimizdan mutaxassislar kelgan edi. Oracle Fusion tizimini O‘zbekistondagi barcha filiallarimiz va ofislarimizda joriy qilish vaqtida xalqaro ekspertlar bilan ishlash imkoniyatiga ega bo‘lganim menga foyda bo‘lgan, deb xotirlaydi suhbatdoshimiz.
Bu kompaniyada katta hajmdagi moliyaviy maʼlumotlarni ilg‘or texnologiyalar yordamida tahlil qilib, biznes qarorlarni qabul qilishga ko‘maklashishni o‘rgandim.
Haqiqatdan ham, aynan shunaqa transmilliy kompaniyalarning O‘zbekistonda faollashishi, o‘zining biznes jarayonlarini takomillashtirishiga yosh mutaxassislarni jalb qilishi tufayli Sherzod xalqaro tajribaga ega bo‘ldi.
2021-yil u magistraturani o‘qish uchun AQSHga borishga qaror qiladi. Hujjatlar topshiradi va birdaniga bir nechta universitetga qabul qilinadi. Bakalavrni ham grantga o‘qib tugatgan Sherzodga Jorj Vashington universiteti 85 ming, Boston universiteti 70 ming, Babson Kollej 40 ming dollar miqdorda chegirma berishini bildiradi.
– “Yaxshilab o‘ylab, biladigan insonlar bilan maslahatlashib, Pennisilvaniya shtatidagi Lexay universitetini tanladim. U yerda MBA (biznesni boshqarish bo‘yicha magistratura) dasturiga qabul qilingandim, universitet 60 ming dollar miqdorida “olimlik puli”, yaʼni grant ajratgandi. Universitetdagi professorlar tarkibi kuchli bo‘lgani, Wall Street Journal ham uni AQSHning eng zo‘r universitetlari ro‘yxatiga kiritgani uchun aynan Lexay universitetida o‘qishga qaror qildim”.
MBA dasturida biznes analitika bo‘yicha kurslarni o‘tagan Sherzod Esanov tahsili davomida nafaqat eng yaxshi professorlar bilan birga ishlaydi, ilmiy ish qiladi, balki amaliy tajribasini ham oshiradi. Nyu-Jersi shtatining Port Myurrey shahrida joylashgan hamda qayta ishlanuvchi, ilg‘or polyolefin (plastik) yechimlari ishlab chiqish bo‘yicha dunyoda yetakchi bo‘lgan Borealis Compounds kompaniyasida supply chain hamda analatika bo‘yicha consultant bo‘lib ishlaydi va strategik tahliliy hisob-kitoblar natijasida kompaniyaning savdo aylanmasini sezilarli foydaga kiritadi.
Hozirda Sherzod Esanov biotexnologiya va farmatsevtika kompaniyalari uchun xizmat ko‘rsatayotgan Data analytics kompaniyasi Axtriaʼda faoliyat yuritmoqda. Oydan oyga o‘sib borayotgan zamonaviy kompaniyada u xaridorlar xatti-harakatlarini o‘rganish, marketingda qaror qabul qilishda sunʼiy idrok va Machine learning texnologiyalarini qo‘llagan holda maʼlumotlarni tahlil qilib, biznes jarayonlarni tezlashtirish va natijada savdoni oshirish bo‘yicha tayanch vazifalarni bajaryapti.
Xullas, G‘allaorol va Toshkentdagi maktab partalarida o‘tirib, O‘zbekistondagi mahalliy oliy taʼlim muassasasini bitirgan mutaxassis jahon toifasidagi ishlarni uddalab kelmoqda.
“Kattaroq maqsad qo‘yishdan qo‘rqmang, harakat bilan ko‘p narsaga erishsa bo‘ladi. Omad bu tayyorgarlik va u imkoniyat bilan uchrashganda keladi,” deydi u.
“Kichkina tabib”da Teshavoyning yupanchi “hali bularning ham kasalini o‘rganib olasan” deb davom etardi. Global va regional brendlar, jahon toifasidagi kompaniyalar mamlakatimizga kirib kelib, faollasharkan, mahalliy mutaxassislar ham “uydagi o‘yinlar” hisobiga tajriba to‘plab, xalqaro maydonda zo‘r mutaxassis bo‘lishga erisha oladi.
Shuhrat G‘aybullayev
Izoh (1)
Bu inson mening tog'am