Samarqand viloyatining Urgut, Toshkent shahrining Uchtepa, Navoiy shahri hamda Toshkent viloyatining Bekobod shaharlarida xorijiy davlatlarga ishga yuborishni vaʼda qilgan shaxslar ushlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Maʼlum qilinishicha, Urgut tumanida fuqarolar S.A. va S.M. fuqarolar A.N. va B.T.ning ishonchiga kirib, ularni 22 ming dollar evaziga AQSHga yuborishini vaʼda qilib, oldindan 15 400 dollarni olgan vaqtida ashyoviy dalillar bilan ushlangan.
Shuningdek, Toshkent shahrining Uchtepa tumanida fuqaro X.I. fuqaro O.B.ning ishonchiga kirib, unga tanishlari yordamida 2 500 dollar evaziga Litvaga ishga borishi uchun hujjatlarini rasmiylashtirib, viza olib berishini aytgan. Shundan 1 500 dollarni olgan vaqtida ashyoviy dalillar bilan ushlangan.
Shu bilan birga, Navoiy shahrida fuqarolar N.Sh. va N.B. fuqaro M.S.ning ishonchiga kirib, uni Janubiy Koreyaga 6 oylik mavsumiy ishga yuborishlari evaziga 2 ming dollarni olgan vaqtida ashyoviy dalillar bilan ushlangan.
Bundan tashqari, Bekobod shahrida fuqaro M.Sh. fuqarolar B.D. va S.D.ni Turkiyaga borishi uchun tanishlari orqali deportini yechib, viza olib berishi evaziga 1 000 dollarni olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Noqonuniy tarzda xorijga ishga yuborish
Avvalroq, Davlat xavfsizlik xizmati Buyuk Britaniyaga ishga yuborish uchun to‘rt kishidan 12 ming dollar olgan shaxs ushlangani haqida xabar bergandi.
Shu kabi holat Toshkent shahrida ham kuzatilgandi. 3 nafar fuqaroni tanishlari yordamida Buyuk Britaniyaga ishga yuborishi va viza olib berishi evaziga 12 000 AQSH dollar olgan fuqaro qo‘lga tushgandi.
Bundan avval Toshkentda fuqaroni Yaponiyaga ishga jo‘natish evaziga 7,4 ming dollar olgan shaxs, Samarqandda to‘rt kishini Polshaga ishga yuborishi evaziga jami 10 700 dollarni firibgarlik yo‘li bilan qo‘lga kiritgan shaxsga jinoyat ishi qo‘zg‘atilgandi. Samarqand, Jizzax va Toshkentda fuqarolarni xorijga ishga yuborishni vaʼda qilgan shaxslar ushlangandi.
Prezidentning “Xorijda mehnat faoliyatini amalga oshirish jarayonlarini tartibga solish bo‘yicha qo‘shimcha chora-tadbirlar to‘g‘risida”gi qarori qabul qilingan bo‘lib, unga ko‘ra 2024-yil 1-noyabrdan xorijiy ish beruvchilar tomonidan taklif qilinayotgan ish o‘rinlari haqidagi barcha maʼlumotlar Migratsiya agentligining elektron platformasi, OAV va ijtimoiy tarmoqlarda ochiq eʼlon qilib boriladi.
Izoh (0)