Vladimir Zelenskiy Ukrainaning Rossiya bilan mudofaa urushida xavfsizlik kafolatlarisiz o‘t ochishni to‘xtatishni bema’nilik deb atadi.
“O‘t ochishni to‘xtatishga urushda ishtirok etgan, ayniqsa, jabrlangan davlat xavfsizlik kafolatlarini olishini bilsagina erishiladi”, dedi u Budapeshtdagi Yevropa siyosiy hamjamiyati sammitida.
Zelenskiy, shuningdek, Vengriya bosh vaziri Viktor Orbanning Ukrainani NATOga qabul qilishdan bosh tortishi va urushni to‘xtatishni talab qilishini ham bema’nilik deb hisoblagan.
“O‘t ochishni to‘xtatishni taklif qilgan, lekin xavfsizlik kafolatlariga qarshi chiqqan rahbar shunchaki mahmadona”, dedi Zelenskiy.
U Kiyevning xavfsizlik kafolatlarisiz Ukrainadagi urushda o‘t ochishni to‘xtatish talablarini “juda xavfli ritorika” deb atagan.
“Avvaliga o‘t ochishni to‘xtating, keyin ko‘ramiz. Siz kimsizki, bunday narsani talab qilasiz?”, deydi u.
Ukraina prezidenti AQSHning yangi saylangan yetakchisi Donald Tramp haqiqatan ham urush tezroq tugatilishini istashiga ishonch bildirgan, biroq “tezkor yechim” Ukraina uchun yo‘qotishlarga olib kelishini ta’kidlagan. Shu bilan birga, Zelenskiy urush haqiqatan ham tezda tugatilishi mumkinligiga shubha bildirgan.
Izoh (0)