Shveysariya Yevropa davlatlariga qarshi Rossiyaning ehtimoliy tajovuzi haqidagi xavotirlar fonida o‘z yadroviy boshpanalar tarmog‘ini modernizatsiya qilish uchun 250 million dollarga yaqin mablag‘ sarflashni rejalashtirmoqda.
“Mazkur mamlakatda to‘qqiz million aholining har biri uchun bunkerlar mavjud”, deb yozadi The Times.
Agar ilgari buni “jinnilik” deb hisoblangan bo‘lsa, hozirda “qurolli to‘qnashuv holatidagi barqarorlik” deb atash mumkin.
Shveysariya NATO a’zosi bo‘lmasa-da, ammo u allaqachon yalpi mojaroga tayyorgarlik ko‘rmoqda. 1963-yilgi qonunga ko‘ra, Shveysariyaning barcha aholisi, shu jumladan chet elliklar va qochqinlar yadro, biologik va kimyoviy qurollardan, shuningdek, “oddiy qurol zarbalaridan” himoya qilish qobiliyatiga ega bo‘lgan boshpana bilan ta’minlangan.
Mamlakatda taxminan 370 mingta xususiy va davlat yadroviy boshpanasi mavjud. Ma’lumotlarga ko‘ra, aksariyat odamlarning boshpanasi uylarining yerto‘lasida joylashgan, chunki quruvchilar 38 va undan ortiq xonali har qanday binoda kamida 25 kishilik boshpana qurishi shart.
Shveysariya bunkerlar qurish qoidalaridagi ayrim istisnolarni bekor qilishni rejalashtirmoqda. Qonunga binoan, bunkerlar portlashga chidamli eshiklarga ega bo‘lgan temir-betondan qurilishi, favqulodda chiqish yo‘li va filtrlangan ventilyatsiya tizimiga ega bo‘lishi kerak. Kattaroq boshpanalar ifloslangan havoning kirishini oldini olish uchun havo shlyuziga ham ega bo‘lishi lozim.
Vo kantoni fuqaro mudofaasi boshlig‘i Lui-Anri Delagarezning aniqlik kiritishicha, boshpanalarni modernizatsiya qilish biron-bir mojaroga tayyorgarlik ko‘rish maqsadida emas, balki ularni ishchi holatda saqlash zarurati tufayli rejalashtirilgan.
Yaqinda, Vo kantonidagi Berche qishlog‘ida joylashgan turar-joy binosida o‘n yilda bir marta o‘tkaziladigan majburiy tekshiruv paytida bunkerlardan birining eshigi yopilmasligi, o‘rgimchak to‘ri bilan qoplangan evakuatsiya yo‘lagi esa narvonsiz chuqur lyukka olib borishi aniqlandi.
Boshpana foydalanishga yaroqsiz deb topilgach, bino aholisiga nosozliklarni tuzatish uchun bir yil muhlat berildi. Aks holda, ular jamoat boshpanasidagi joy uchun 710 funt sterling (taxminan 900 AQSH dollari) to‘lashlari kerak bo‘ladi.
Izoh (0)