Швейцария Европа давлатларига қарши Россиянинг эҳтимолий тажовузи ҳақидаги хавотирлар фонида ўз ядровий бошпаналар тармоғини модернизация қилиш учун 250 миллион долларга яқин маблағ сарфлашни режалаштирмоқда.
“Мазкур мамлакатда тўққиз миллион аҳолининг ҳар бири учун бункерлар мавжуд”, деб ёзади Тhе Times.
Агар илгари буни “жиннилик” деб ҳисобланган бўлса, ҳозирда “қуролли тўқнашув ҳолатидаги барқарорлик” деб аташ мумкин.
Швейцария НАТО аъзоси бўлмаса-да, аммо у аллақачон ялпи можарога тайёргарлик кўрмоқда. 1963 йилги қонунга кўра, Швейцариянинг барча аҳолиси, шу жумладан чет элликлар ва қочқинлар ядро, биологик ва кимёвий қуроллардан, шунингдек, “оддий қурол зарбаларидан” ҳимоя қилиш қобилиятига эга бўлган бошпана билан таъминланган.
Мамлакатда тахминан 370 мингта хусусий ва давлат ядровий бошпанаси мавжуд. Маълумотларга кўра, аксарият одамларнинг бошпанаси уйларининг ертўласида жойлашган, чунки қурувчилар 38 ва ундан ортиқ хонали ҳар қандай бинода камида 25 кишилик бошпана қуриши шарт.
Швейцария бункерлар қуриш қоидаларидаги айрим истисноларни бекор қилишни режалаштирмоқда. Қонунга биноан, бункерлар портлашга чидамли эшикларга эга бўлган темир-бетондан қурилиши, фавқулодда чиқиш йўли ва филтрланган вентиляция тизимига эга бўлиши керак. Каттароқ бошпаналар ифлосланган ҳавонинг киришини олдини олиш учун ҳаво шлюзига ҳам эга бўлиши лозим.
Во кантони фуқаро мудофааси бошлиғи Луи-Анри Делагарезнинг аниқлик киритишича, бошпаналарни модернизация қилиш бирон-бир можарога тайёргарлик кўриш мақсадида эмас, балки уларни ишчи ҳолатда сақлаш зарурати туфайли режалаштирилган.
Яқинда, Во кантонидаги Берче қишлоғида жойлашган турар жой биносида ўн йилда бир марта ўтказиладиган мажбурий текширув пайтида бункерлардан бирининг эшиги ёпилмаслиги, ўргимчак тўри билан қопланган эвакуация йўлаги эса нарвонсиз чуқур люкка олиб бориши аниқланди.
Бошпана фойдаланишга яроқсиз деб топилгач, бино аҳолисига носозликларни тузатиш учун бир йил муҳлат берилди. Акс ҳолда, улар жамоат бошпанасидаги жой учун 710 фунт стерлинг (тахминан 900 АҚШ доллари) тўлашлари керак бўлади.
Изоҳ (0)