Iqtisodiyot va tinchlik instituti 2021-yilgi “Tinchliksevarlik global indeksi”ni e’lon qildi. Unda O‘zbekiston 163 davlat ichida 90-o‘rinni egalladi.
Institut hisobotiga ko‘ra, 2020-yilga nisbatan O‘zbekiston 13 pog‘onaga yuqorilagan. Tahlilchilarning fikriga ko‘ra, O‘zbekiston o‘rtacha tinchlik darajasiga ega mamlakatlar guruhiga kiradi. Shuningdek, ushbu guruhdan Qozog‘iston (67-o‘rin), Qirg‘iziston (76-o‘rin), Tojikiston (97-o‘rin), Turkmaniston (109-o‘rin), Ozarbayjon (121-o‘rin) o‘rin olgan.
Eng agressiv davlatlar qatoridan Shimoliy Koreya, Venesuela, Sudan, Rossiya, Liviya, Suriya, Yaman va Afg‘oniston o‘rin egallagan.
Islandiya eng tinch mamlakat sifatida tan olingan. Eng tinch mamlakatlarning o‘ntaligiga, shuningdek, Yangi Zelandiya, Daniya, Portugaliya, Sloveniya, Avstriya, Shveysariya, Irlandiya, Chexiya, Kanada, Singapur va Yaponiya kirgan.
Bundan tashqari ro‘yxatda Xitoy 100-o‘rinda, AQSh 122-o‘rinda, Hindiston 135-o‘rinda hamda Turkiya 149-o‘rinda qayd etilgan. To‘liq ro‘yxatni ushbu havolada ko‘rish mumkin.
Tinchlik indeksining o‘sishi 87 mamlakatda, yomonlashuvi 73 mamlakatda qayd etilgan. Umuman olganda, tinchlik global ko‘rsatkichi 0,07 foizga yomonlashgan.
Ma’lumot uchun, jahon reytingida ijtimoiy birdamlik darajasi, inson huquqlariga rioya qilish, siyosiy va iqtisodiy barqarorlik, qamoqxonalardagi mahbuslar soni, terrorizm tahdidi darajasi, mudofaa xarajatlari va mamlakatning harbiy harakatlardagi ishtiroki kabi omillar hisobga olingan.
Bundan avval O‘zbekiston “Siyosatdagi ayollar” jahon reytingida 45-o‘rinni egallagani, yashash uchun dunyodagi eng qulay shaharlar reytingi e’lon qilingani hamda O‘zbekiston internet tezligi bo‘yicha jahon reytingida yana ko‘tarilgani haqida xabar berilgandi.
Izoh (0)