Ukraina Xavfsizlik xizmati (UXX) mamlakat janubidagi Moskva nazoratidagi Zaporojye viloyatida Rossiya qo‘shinlari uchun mo‘ljallangan 40 ta yoqilg‘i vagonini yo‘q qilish operatsiyasini o‘tkazganini ma’lum qildi.
UXX Reuters’ga operatsiya turli razvedka va harbiy xizmatlar ishtirokida bir necha bosqichda amalga oshirilganini bildirdi.
“Maqsad Qrimdan Zaporojye viloyatining vaqtinchalik bosib olingan hududlariga yoqilg‘i yetkazib berish logistikasini izdan chiqarish edi”, deyiladi Ukraina tomoni bayonotida.
Rossiya hozircha ushbu voqea haqidagi xabarlarga izoh bermadi.
UXX ma’lum qilishicha, uning bo‘linmalaridan biri Rossiya nazoratidagi Zaporojye viloyatining Alekseyevka qishlog‘i hududida poyezd harakatlanayotgan temiryo‘l liniyasiga zarar yetkazish uchun diversiya operatsiyasini uyushtirgan.
Poyezd to‘xtatilgan, sisternalar yongan va Ukraina armiyasi bo‘linmalari voqea joyiga AQSH tomonidan yetkazib berilgan HIMARS qurilmalari bilan zarba bergan.
“Raketalar lokomotiv va tarkibning oxirgi vagonlariga zarba berdi. Dushman sisternalarga yetib olib, yoqilg‘ining bir qismini ham saqlab qololmadi. Maxsus operatsiya natijasida lokomotiv va 40 ta sisterna yo‘q qilindi hamda Rossiya qo‘shinlarini ta’minlash uchun foydalaniladigan muhim temiryo‘l liniyasi uzoq vaqtga ishdan chiqarildi”, deyiladi bayonotda.
Rossiya kuchlari Zaporojye viloyati hududining, taxminan, 70 foizini nazorat qiladi, Ukraina harbiy vakili esa o‘tgan oyda Kiyev yaqin kelajakda ushbu mintaqada Moskva tomonidan keng ko‘lamli hujumlar boshlanishini kutayotganini aytgan edi.
Rossiya qo‘shinlari, shuningdek, qo‘shni Xerson viloyatining taxminan 70 foizini va mamlakat sharqidagi Donbassning 80 foizga yaqinini nazorat qiladi. Bu hudud 33 oydan beri davom etayotgan urushning asosiy jang maydoniga aylangan.
Izoh (0)