Украина Хавфсизлик хизмати (УХХ) мамлакат жанубидаги Москва назоратидаги Запорожье вилоятида Россия қўшинлари учун мўлжалланган 40 та ёқилғи вагонини йўқ қилиш операциясини ўтказганини маълум қилди.
УХХ Reuters’га операция турли разведка ва ҳарбий хизматлар иштирокида бир неча босқичда амалга оширилганини билдирди.
“Мақсад Қримдан Запорожье вилоятининг вақтинчалик босиб олинган ҳудудларига ёқилғи етказиб бериш логистикасини издан чиқариш эди”, дейилади Украина томони баёнотида.
Россия ҳозирча ушбу воқеа ҳақидаги хабарларга изоҳ бермади.
УХХ маълум қилишича, унинг бўлинмаларидан бири Россия назоратидаги Запорожье вилоятининг Алексеевка қишлоғи ҳудудида поезд ҳаракатланаётган темирйўл линиясига зарар етказиш учун диверсия операциясини уюштирган.
Поезд тўхтатилган, цистерналар ёнган ва Украина армияси бўлинмалари воқеа жойига АҚШ томонидан етказиб берилган HIMARS қурилмалари билан зарба берган.
“Ракеталар локомотив ва таркибнинг охирги вагонларига зарба берди. Душман цистерналарга етиб олиб, ёқилғининг бир қисмини ҳам сақлаб қололмади. Махсус операция натижасида локомотив ва 40 та цистерна йўқ қилинди ҳамда Россия қўшинларини таъминлаш учун фойдаланиладиган муҳим темирйўл линияси узоқ вақтга ишдан чиқарилди”, дейилади баёнотда.
Россия кучлари Запорожье вилояти ҳудудининг, тахминан, 70 фоизини назорат қилади, Украина ҳарбий вакили эса ўтган ойда Киев яқин келажакда ушбу минтақада Москва томонидан кенг кўламли ҳужумлар бошланишини кутаётганини айтган эди.
Россия қўшинлари, шунингдек, қўшни Херсон вилоятининг тахминан 70 фоизини ва мамлакат шарқидаги Донбасснинг 80 фоизга яқинини назорат қилади. Бу ҳудуд 33 ойдан бери давом этаётган урушнинг асосий жанг майдонига айланган.
Изоҳ (0)