Rossiya aviatsiya korxonalari bu yil rejalashtirilgan 15 ta tijoriy samolyotdan atigi bittasini yetkazib berdi. Sanksiyalar sabab xorijiy butlovchi qismlar bilan muammo yuzaga kelgan, markaziy bankning yuqori foiz stavkalari esa sarmoyalarni cheklamoqda. Bu haqda Reuters ma’lum qildi.
Agentlik ma’lumotlariga ko‘ra, Rossiya aviakompaniyalari parki 700 dan ortiq samolyotdan iborat bo’lib, asosan Airbus va Boeing modellaridan tashkil topgan. Biroq Ukrainaga keng ko‘lamli bosqin boshlagan 2022-yil fevralidan buyon mamlakat uchun mazkur bozor yopilgan.
Rossiyaliklar nafaqat yangi samolyotlar ishlab chiqarish, balki eskilariga texnik xizmat ko‘rsatishda ham muammolarga duch kelmoqda. Eng muhim butlovchi qismlarni murakkab va aylanma yo‘llar orqali import qilishga to‘g‘ri kelyapti.
“Butlovchi qismlar bazasi, texnologiya, ishlab chiqarish quvvatlari, muhandislar yo‘q. Bularning barchasini noldan yaratish uchun o‘n yillar bo‘lmasa-da, yillar kerak bo‘ladi”, degan Rossiya aviatsiya sanoatidagi manbalardan biri.
Yaqinda sodir bo‘lgan jiddiy hodisalar Rossiya uchun o‘z aviaparkining joriy holatini saqlab qolish oson bo‘lmasligini ko‘rsatib qo‘ydi. Iyul oyida 1976-yili ishlab chiqarilgan An-24 samolyoti Amur viloyati hududida halokatga uchradi. Oradan bir necha kun o‘tgach, mamlakatning eng yirik “Aeroflot” kompaniyasi xakerlar nishoniga tushib, natijada o‘nlab reyslar qoldirildi.
Agentlikning yozishicha, aviatsiya sektorining ichki imkoniyatlarga suyanishga bo‘lgan urinishlari umumiy sanoatning sekinlashuvi sabab oqsamoqda. Purchasing Managers Index ma'lumotlariga ko‘ra, iyul oyida Rossiyada sanoat ishlab chiqarishi 2022-yil martidan beri eng tez sur’atda pasaygan.
Yuqori foiz stavkalari avtomobil ishlab chiqarish hajmining kamayishiga, ko‘mir sektoridagi bankrotlikka, metall va neft mahsulotlari kabi tovarlar eksportining sekinlashishiga hamda samolyot ishlab chiqarish rejalarining bajarilmasligiga olib keldi. Rasmiylar va biznes vakillarining aytishicha, bu omillar iqtisodiy o'sishni orqaga tortmoqda.
Uchinchi tomonlar orqali sxema
G‘arb sanksiyalari joriy etilganidan buyon Rossiya Boeing va Airbus samolyotlari uchun qariyb 190 million dollarlik ehtiyot qismlari xarid qilishga muvaffaq bo’ldi. Ularning aksariyati Turkiya, BAA va Xitoydan olib kelingan.
Asosiy yetkazib beruvchi Dubayda joylashgan Ats Heavy Equipment & Machinery kompaniyasi bo‘lib, u bir yildan sal ko'proq vaqt ichida Rossiyaga 700 dan ortiq yuk jo‘natmasini amalga oshirgan.
Izoh (0)