Davlat xavfsizlik xizmatining Namangan viloyati bo‘yicha boshqarmasi xodimlari tomonidan viloyat bojxona boshqarmasi xodimlari bilan hamkorlikda Namangan shahrida tezkor tadbir o‘tkazildi.
Tadbir davomida Uchqo‘rg‘on tumanida yashovchi, muqaddam Jinoyat kodeksining 273-moddasi bilan sudlangan 36 yoshli T.SH. shaxsiy tintuvdan o‘tkazilganida, uning yonida 10,6 ming dollar miqdoridagi qalbaki chet el valyutasi borligi aniqlanib, protsessual tartibda rasmiylashtirib olingan.
Tergovga qadar tekshiruv davomida u qalbaki xorijiy valyutalarni Yangiqo‘rg‘on tumanida yashovchi 36 yoshli M.B.dan olgani ma’lum bo‘lib, u ham qo‘lga olingan.
Aniqlanishicha, Qirg‘iziston fuqarosi bo‘lgan Tinar ismli shaxs tomonidan aylanma yo‘llar orqali Yangiqo‘rg‘on tumani hududiga o‘tkazilgan ushbu qalbaki valyutalar Toshkent shahrida muomalaga chiqarilishi kerak bo‘lgan.
Hozirda holat yuzasidan T.SH. va M.B.ga nisbatan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) bilan jinoyat ishi qo‘zg‘atilib, tergov harakatlari olib borilmoqda.
Bundan oldin Toshkentdagi bankda salkam 60 million so‘mga ayirboshlangan yevro tangalar qalbaki bo‘lib chiqqani, Toshkent viloyatida qalbaki 100 ming so‘mlik kupyuralarni tayyorlash bilan shug‘ullangan oila aniqlangani, Toshkent viloyatida qalbaki 1100 dollarni 500 dollarga sotmoqchi bo‘lgan shaxslar ushlangani to‘g‘risida xabar berilgandi.
Izoh (0)