“Manchester Siti” va Norvegiya terma jamoasi hujumchisi Erling Holand 60 Shveysariya franki (64,36 yevro) miqdoridagi to‘lanmagan jarima tufayli Shveysariyaga kelsa, bir kunlik qamoq jazosiga mahkum etilishi mumkin, deb xabar beradi Blick nashri.
Holandning ismi Shveysariyaning g‘arb qismida joylashgan Vo kantonidagi rasmiy e’lonlar ro‘yxatida qayd etilgan. Agar futbolchi to'lovni amalga oshirmasa, keyingi safar Shveysariyaga kelganida hibsga olinishi va bir kun qamoqda o‘tirishi mumkin.
Holandning otasi, sobiq norvegiyalik futbolchi Alf-Inge Holand Shveysariyada yashaydi.
Ma’lumot uchun, Holand 24 yoshda. U “Manchester Siti”da 2022-yildan buyon o‘ynab kelmoqda. Norvegiyalik futbolchi ingliz klubi tarkibida ikki bor Angliya chempioni bo‘ldi. Bundan tashqari, Angliya Kubogi, Angliya Superkubogi, Chempionlar Ligasi va UEFA Superkubogini qo‘lga kiritdi. Norvegiya terma jamoasida gol urish bo‘yicha rekord ham Holandga tegishli (38).
Izoh (0)