Bojxona xodimlari tomonidan respublika hududiga havo yo‘llari orqali qalbaki valyutalarni olib kirishga uringan shaxs ushlandi. Bu haqda Davlat bojxona qo‘mitasi matbuot xizmati xabar berdi.
Ma’lum qilinishicha, Toshkent xalqaro aeroportida Istanbul–Olmaota–Toshkent yo‘nalishi bo‘yicha uchib kelgan yo‘lovchining bagajida qalbaki 5 ming dollar borligi aniqlangan. Kupyuralarning aksariyatida seriya raqamlari ham bir xil bo‘lgan.
Tezkor tadbir davom ettirilib, aeroport avtoturargohida va Yashnobod tumanida jinoyatga aloqador bo‘lgan shaxslar ham qo‘lga olingan. Ulardan birining Lacetti’si tekshirilganida yana soxta 5 ming dollar borligi aniqlandi.
Yunusobod tumanida esa qalbaki pullarning haqiqiy egasi uni olayotganida qo‘lga olindi. Hozirda holat bo‘yicha jinoyat ishi qo‘zg‘atildi.
Bundan avval Toshkentda qalbaki valyutalar evaziga telefon xarid qilib, o‘nlab fuqarolarni chuv tushirgan shaxs qo‘lga olingani, Sirdaryodagi bankda 81 ming yevro qalbaki valyuta aniqlangani hamda O‘zbekistonga qalbaki avtoraqamlar olib kirilayotgani aniqlangani haqida xabar berilgandi.
Izoh (0)