Jahon banki Ukrainaga 750 million dollar miqdorida yangi yordam paketini e’lon qildi. Bu haqda mamlakat bosh vaziri Denis Shmigal o‘zining Telegram kanalida ma’lum qildi.
“Mablag‘lar Yevropa ittifoqiga qo‘shilish uchun zarur bo‘lgan institutsional islohotlarni qo‘llab-quvvatlashga qaratilgan “Sog‘lom fiskal boshqaruv orqali tiklanishni qo‘llab-quvvatlash” loyihasi doirasida taqdim etiladi. Ushbu mablag‘ning bir qismi Yaponiya hukumati tomonidan qo‘llab-quvvatlanadigan Advance Ukraine jamg‘armasidan ajratiladi”, deb yozdi u.
Shmigalning aniqlik kiritishicha, agar kerak bo‘lsa, moliyalashtirish ko‘paytirilishi mumkin.
Noyabr oyi boshida Ukraina hukumati Jahon banki bilan qariyb 600 million dollarlik shartnomalar imzolagan edi. Shmigal o‘shanda aytganidek, bu mablag‘lar kichik va o‘rta biznesni qo‘llab-quvvatlash, “yashil energetika”ga o‘tish, ishbilarmonlik muhitini yaxshilash va raqamlashtirishga sarflanadi.
Smigalning qo‘shimcha qilishicha, dasturning rejalashtirilgan umumiy hajmi 1 milliard dollardan oshadi va 2027-yilgacha mo‘ljallangan. Shu bilan birga, bosh vazir bu mablag‘lar Kiyevga qanday asosda: kredit ko‘rinishida yoki beg‘araz berilishiga aniqlik kiritmagan.
Izoh (0)