Germaniya uzoq tanaffusdan so‘ng xorijliklarga, jumladan, rus va belarus fuqarolariga gumanitar vizalar berishni qayta yo‘lga qo‘yadi. Bu haqda mamlakat rasmiylariga tayanib, Deutsche Welle xabar berdi.

Germaniya Tashqi ishlar vazirligi va Ichki ishlar vazirligi cheklovlar olib tashlanganini tasdiqladi. Har ikkala vazirlik mamlakat “Yashash to‘g‘risidagi qonun”ga muvofiq, o‘z siyosiy manfaatlariga xizmat qiladigan hollarda xorijliklarni qabul qilishi mumkinligini ta’kidladi. Ushbu mexanizm barcha chet ellik fuqarolarga taalluqli bo‘lib, faqat belarus yoki rossiyaliklar uchun alohida ishlab chiqilgan emas.
Rasmiylarning tushuntirishicha, bunday imkoniyatdan so‘z erkinligi, demokratiya va inson huquqlarini himoya qilgani uchun xavf ostida qolgan shaxslar yoki Germaniyaga kirishi siyosiy manfaatlarga xizmat qiladigan xorijliklar foydalana oladi. Biroq mulozimlar avvalgi hukumat davrida Rossiya, Belarus va Eron fuqarolari uchun qo‘llanilgan tezlashtirilgan qabul tartibi endi ishlamasligini alohida ta’kidladi.
Yevroparlament deputati Sergey Lagodinskiy ham moratoriy bekor qilinganini tasdiqladi. U hukumat vakillari qarorni ochiq e’lon qilganini aytib, Germaniya Tashqi ishlar vazirligiga minnatdorlik bildirdi.
Vizalar nega to‘xtatilgandi?
Germaniya Ichki ishlar vazirligi ma’lumotiga ko‘ra, 2022-yil mayidan beri 2 490 nafar Rossiya hamda 2021-yil martidan beri 410 nafar Belarus fuqarosi gumanitar viza uchun ariza topshirgan. Biroq yangi hukumatning chet elliklarni qabul qilish dasturlarini qisqartirish qarori gumanitar asosdagi arizalarga ham ta’sir qilgan. Shu sababli yangi arizalarni qabul qilish vaqtincha to‘xtatilgan edi.
Vazirlikning ta’kidlashicha, yangi qoidalar gumanitar viza asosida allaqachon Germaniyada istiqomat qilayotganlarga ta’sir qilmaydi. Ular yashash ruxsatnomalarini amaldagi tartib asosida olishda davom etadi.
Izoh (0)