NATO bosh kotibi Yens Stoltenberg Ukrainani qayta tiklash masalasini hal qilish uchun avvalo uning urushdagi g‘alabasini ta’minlashi kerakligini aytdi. Uning so‘zlariga ko‘ra, agar Ukraina mag‘lub bo‘lsa, qayta tiklanadigan hech narsa qolmaydi.
“Urushdan keyin Ukrainaning tiklanishiga kelsak, biz birinchi navbatda uning g‘alaba qozonishini ta’minlashimiz kerak. Agar Ukraina g‘alaba qozonmasa, unda erkin va mustaqil Ukrainada qayta tiklanadigan hech narsa bo‘lmaydi”, — dedi bosh kotib NATO yoshlar sammitida. U mamlakatni qayta tiklash masalasi kelajakda juda muhim bo‘lishini, ammo hozirda asosiy ustuvorlik urushda g‘alaba qozonish ekanini ta’kidladi.
Stoltenbergning qo‘shimcha qilishicha, aynan shu sababdan ittifoq mamlakatlari Ukrainaga ko‘rsatayotgan yordamini kuchaytirish zarur. Uning so‘zlariga ko‘ra, NATO ham Ukrainaga mudofaa va xavfsizlik institutlarini tiklashga hamda mamlakatga har tomonlama yordam berishga tayyor.
Jahon banki, BMT, Yevropa komissiyasi va Ukraina hukumatining fevral oyidagi prognozlariga ko‘ra, Ukrainani tiklash uchun o‘n yilga 486 milliard dollar kerak bo‘ladi. Mablag‘ning 17 foizi uy-joy qurilishiga, 15 foizi transportga, 14 foizi savdo va sanoatga, 12 foizi qishloq xo‘jaligiga, 10 foizi energetikaga yo‘naltirilishi kerak. Barcha tarmoqlardagi chiqindilarni tozalash uchun 11 milliard dollar talab qilinadi.
Izoh (0)