Qirg‘iziston hukumati Issiqko‘l hozirda xavf ostida ekanini aytib, uni saqlab qolish masalasini xalqaro miqyosda ko‘tarish niyatini bildirdi.
Qirg‘iziston Vazirlar Mahkamasi raisi o‘rinbosari Edil Baysalov COP29 doirasida o‘tkazilgan iqlim o‘zgarishi sharoitida suv resurslaridan foydalanishga bag‘ishlangan tadbirda Issiqko‘lda suv sathi yildan-yilga pasayib borayotganini qayd etdi.
Rasmiyga ko‘ra, bu masala Qirg‘izistonning qo‘shnilarini ham tashvishga solmoqda.
“Unga bir necha o‘nlab daryolar quyiladi, biroq bittasi ham oqib ketmaydi. Biz uchun bu ko‘l muqaddasdir. Albatta, Issiqko‘l atrofidagi dehqonlarimizni suvni tejashga o‘rgatamiz, lekin yana bir narsaga e’tibor qaratmoqchiman. Ko‘lga katta hajmda oqib tushadigan daryolar endi qo‘shni davlatlarning irrigatsiya manfaatlari uchun yo‘naltirilmoqda. Biz bu masalani ko‘taramib, uni ochiq va adolatli muhokama qilamiz. Biz Orol dengizini yo‘qotdik. Issiqko‘lni saqlab qolishimiz kerak, yaqin kelajakda bu mavzuda xalqaro anjumanlar o‘tkazamiz”, deydi u.
Avvalroq Qirg‘iziston Bosh vaziri Aqilbek Japarov Jogorku Keneshda so‘zlagan nutqida Issiqko‘l qurib borayotgan Orol taqdirini takrorlamasligi kerakligini ta’kidlagan edi.
Ko‘lning suv balansiga nafaqat iqlim o‘zgarishi, balki inson omili ham katta ta’sir ko‘rsatadi. Qirg‘iziston Bosh vaziri maʼlum qilganidek, qishloq xo‘jaligining jadal rivojlanishi Karkira va Qo‘chqor daryolari suvining salmoqli qismi fermerlar tomonidan ko‘lga tushmasdan foydalanishiga olib kelmoqda.
“Issiqko‘l bilan mavjud muammoni hal qilish maqsadida Qirg‘iziston hukumati Qozog‘iston va O‘zbekistondan yordam so‘rashni rejalashtirmoqda”, dedi Japarov.
Bosh vazirning qo‘shimcha qilishicha, Vazirlar Mahkamasi birinchi navbatda ichki ehtiyojlarni qondirish uchun suv eksportini qisqartirish bo‘yicha muzokaralar olib borish niyatida . Bu chora-tadbirlarni Issiqko‘lni qutqarish bo‘yicha xalqaro ilmiy konferensiyada muhokama qilish rejalashtirilgan, uning sanasi hozircha noma’lum.
2023-yil avgust oyida Qirg‘iziston Tabiiy resurslar vazirligi Issiqko‘lda suv sathi 10 yil ichida deyarli bir metrga pasayganini ma’lum qilgan.
“Bunga esa issiq iqlim tufayli ko‘lga quyiladigan kichik daryolar sonining kamaygani sabab bo‘ldi”, deya izoh bergan vazirlik.
Izoh (0)