Qirg‘izistonda 18-avgust kuni kuchli yomg‘ir oqibatida Issiqko‘l viloyatiga sel keldi. Bu haqda mamlakat Favqulodda vaziyatlar vazirligi xabar berdi.
Oqsoy qishlog‘ida tunda 30 ta uyni suv bosdi, sakkiz kishi, jumladan, olti yashar bola evakuatsiya qilindi. Bundan tashqari, Bulan Sogott, Temirovka va Korumdu qishloqlarida ham sel kuzatildi. Temirovkada 100 dan ortiq uylarning hovlilarini suv bosdi.
Hodisa joyiga 80 dan ortiq Favqulodda vaziyatlar vazirligi qutqaruvchilari, uchta motopompa, uchta ekskavator, to‘rtta yuk tashuvchi va bitta buldozer yuborildi. Sel oqibatlarini bartaraf etish ishlariga 300 dan ortiq kishi jalb qilindi. Sel oqimi Bulan Sogot qishlog‘idagi “Issiqko‘l Avrora” sanatoriyasi hovlisiga ham kirib bordi.
Viloyatning Jeti Oguz, Issiqko‘l va Ton tumanlarida favqulodda holat e’lon qilindi. FVV Fuqaro muhofazasi shtabining viloyat yig‘ilishi bo‘lib o‘tganini ma’lum qildi. Suv toshqini oqibatlarini bartaraf etish bo‘yicha tezkor choralar ko‘rish muhokama qilindi. Qutqaruvchilar hududlarni tozalash ishlarini davom ettirmoqda.
Izoh (0)