Issiqko‘l viloyatining Ton tumanida 21-avgust kuni Zindon baland tog‘ ko‘lidan suv toshishi kuzatildi. Hodisa oqibatida 490 kishi evakuatsiya qilindi. Bu haqda “Turmush.kg” xabar berdi.
Hodisa Ton daryosida suv sathining ko‘tarilishiga olib kelgan. Bir qancha aholi punktlari suv toshqini xavfi ostida qolgan. Hosil bo‘lgan toshqin oqibatida qishloq yo‘llari vaqtinchalik yopilgan.
Qirg‘iziston Favqulodda vaziyatlar vazirligi qurbonlar yo‘qligini ma’lum qilgan. Voqea joyiga yetib kelgan qutqaruvchilar va yo‘l xizmati xodimlari ekskavatorlar yordamida toshqin yo‘nalishini o‘zgartirgan. Hozirgi vaqtda Zindon ko‘lidan Ton daryosiga suv oqimini qayta yo‘naltirish ishlari davom etmoqda.
Avvalroq Issiqko‘l viloyatida 18-avgustda kuchli yomg‘irdan keyin yuz bergan sel oqibatlarini bartaraf etish maqsadida favqulodda holat joriy etilgandi.
Izoh (0)