Osiyo mintaqasidagi Jahon chempionati saralashining 6-tur uchrashuvlari yakuniga yetdi. Ushbu turda Shimoliy Koreya— O‘zbekiston, BAA—Qatar, Qirg‘iziston—Eron qarama-qarshiliklari kuzatildi.
-qDgQYK_x.jpg)
Laosda o‘tgan bahsda O‘zbekiston milliy jamoasi Abbosbek Fayzullayevning yagona goli evaziga g‘alaba (0:1) qozondi. 80-daqiqada belgilangan penaltini bartaraf etgan O‘tkir Yusupovning ham qo‘lga kiritilgan 3 ochkoda xizmatlari katta.
Eron Qirg‘izistonga qarshi uchrashuvda jiddiy qarshilikka uchradi. Avvaliga 2 to‘p farqi bilan oldinga chiqib olgan forslar Samarqandning “Dinamo” klubi futbolchisining dubli sabab qiyin ahvolga tushib qoldi. A guruhi yetakchilari Sardor Azmunning 76-daqiqadagi goli sabab Bishkekdan 3 ochko bilan qaytdi — 2:3.
Qatar kutilmaganda BAAga qarshi uchrashuvda 5 ta gol o‘tkazib yubordi. Ushbu uchrashuv Fabio Limaning “benefis”iga aylanib ketdi. Birinchi bo‘limda 3 ta gol urgan futbolchi ikkinchi bo‘limda ham o‘z hisobiga gol yozdirib qo‘ydi va uchrashuvda pokker qayd etdi. Yahyo Al-Hassani uchrashuvdagi beshinchi golga mualliflik qildi.
Ma’lumot uchun, Fabio Lima O‘zbekistonga qarshi uchrashuv uchun Toshkentga kelmagan edi. Sababi, futbolchi BAA klubida o‘ynash uchun O‘zbekiston Respublikasi pasporti bilan ro‘yxatdan o‘tgan. Bu esa ijtimoiy tarmoqlarda muhokamalarga sabab bo‘lib Fabio O‘zbekistonga kelsa, qamoqqa olinishi mumkinligi haqida gaplar tarqalgandi.
6-tur uchrashuvlaridan so‘ng Eron 16 ochko bilan peshqadamlikni saqlab turibdi. O‘zbekiston milliy jamoasidagi ochkolar soni 13 taga yetdi. BAA qatarliklar ustidan qozonilgan g‘alaba evaziga 10 ochko to‘plab, O‘zbekistonni quvishda davom etmoqda. Qatar mundialga to‘g‘ridan-to‘g‘ri chiqish imkonini keskin kamaytirdi. Ular hisobida 7 ochko bor.
O‘zbekistonning 7-turdagi raqibi qo‘shni Qirg‘iz Respublikasi 3 ochko bilan 5-o‘rinda. Shimoliy Koreya 2 ochko bilan guruhda so‘nggi o‘ringa joylashdi.
Ma’lumot uchun, saralashning navbatdagi bahslariga kelgusi yilning mart oyida start beriladi. Guruhda birinchi va ikkinchi o‘rinni olgan jamoalar mundial yo‘llanmasini qo‘lga kiritsa, uchinchi va to‘rtinchi o‘rindagi jamoalar boshqa guruhdagi jamoalar bilan 2,5 ta yo‘llanma uchun kurash olib boradi.
Izoh (0)