O‘tgan tunda Qirg‘izistonda hukumatni noqonuniy egallashga urinish yuz berdi. Bu haqda mamlakat prezidenti So‘ronbay Jeenbekov ma’lum qildi, deb yozadi “RBK”.
“O‘tgan tunda ba’zi siyosiy kuchlar davlat hukumatini noqonuniy egallab olishga urindi. Saylovlar yakunlarini vaj qilib, jamoat tartibini buzishdi. Ular shaharliklarning tinch hayotiga xalaqit berdi. Huquq-tartibot organlariga itoat qilishmadi, tibbiyot xodimlarini do‘pposlashdi va binolarga ziyon yetkazishdi”, — deya prezident bayonotini keltirib o‘tdi “AKIpress” nashri.
Jeenbekov kuch vakillariga birorta ham fuqaroning hayotini xavf ostiga qo‘ymaslik uchun o‘t ochmaslikni buyurganini aytdi.
Davlat rahbarining so‘zlariga ko‘ra, u Markaziy saylov qo‘mitasiga qoidabuzarliklar bilan bog‘liq materiallarni diqqat bilan o‘rganib chiqishni, kerak bo‘lsa, parlament saylovlari natijalarini bekor qilishni tavsiya etgan. Barcha siyosiy kuchlarni u qonun maydoniga qaytishga chorladi. “Davlatdagi xotirjamlik, jamiyat barqarorligi har qanday deputatlik mandatidan ustunroq… Men siyosiy partiyalar yetakchilarini o‘z tarafdorlarini tinchlantirib, ularni olomon to‘plangan joylardan olib chiqib ketishga, hamyurtlarimni tinchlik saqlashga va provokatsion kuchlar da’vatlariga berilmaslikka chaqiraman”, — dedi Jeenbekov.
Bu orada hukumat binosida parlamentga o‘tmagan muxolifat partiyalar yetakchilari vaqtinchalik Vazirlar mahkamasini shakllantirishni muhokama qilmoqda. “Ata-Jurt” muxolifat partiyasi yetakchisi Qamchibek Tashiyev bino yaqinida to‘plangan odamlarga bosh vazir lavozimiga parlament sobiq deputati Sadir Japarov ko‘zda tutilayotganini ma’lum qilgan, u o‘tgan tunda namoyishchilar bosimi ostida hibsdan ozod etilgandi. U Qorako‘lda 2013-yilda mitinglar uyushtirgani hamda Issiqko‘l viloyati gubernatori Emilbek Kaptagayevni garovga olgani uchun 2018-yilda 11,5 yillik qamoq jazosiga hukm qilingan edi. Muvaqqat hukumat tarkibi bo‘yicha yakuniy qarorni muxolifat kechga yaqin qabul qilishni rejalashtirmoqda.
Ma’lumot uchun, mamlakatning bir necha ming aholisi Qirg‘izistonda bir kun avval bo‘lib o‘tgan parlament saylovlari natijalaridan norozi bo‘lgani uchun mitingga chiqqan. Rasmiy ma’lumotlarga ko‘ra, 16 ta ishtirokchi partiyadan 4 tasigina Jo‘qorg‘i Kengeshga o‘tgan, ulardan 2 tasi — hukumatga qarashli. Saylovlarda ko‘p sonli qoidabuzarliklar, shu jumladan, ovozlarni sotib olish qayd etilgan. Mag‘lub bo‘lgan partiyalar vakillari ovoz berish yakunlarini tan olishdan bosh tortdi va Markaziy saylov qo‘mitasini ularni bekor qilishga chaqirdi.
Izoh (0)