Qirg‘iziston Milliy xavfsizlik davlat qo‘mitasi xodimlari tomonidan ikki marta mamlakat prezidenti Sadir Japarovga uyushtirilgan suiqasdning oldi olindi. Bu haqda Milliy xavfsizlik davlat qo‘mitasi rahbari Qamchibek Tashiyev ma’lum qildi.
Tashievning aytishicha, unga qarshi ham 5-6 marta suiqasd tayyorlangan.
“Ular hatto men o‘tadigan yo‘lni portlatib yuborishga tayyorgarlik ko‘rishgan edi. Maxsus xizmatlar va politsiyaning hushyorligi ularning rejalarini amalga oshirishga imkon bermadi”, deydi u.
Tashiyevning so‘zlariga ko‘ra, bunday suiqasdga urinishlar davom etmoqda, ularga katta moliyaviy resurslar ajratilmoqda.
Avvalroq Qirg‘iziston Milliy xavfsizlik rahbariga suiqasdga urinishning oldi olingani xabar qilingandi.
Suiqasdni tashkil qilishga uringan Ruslan Bosterinskiy laqabli uyushgan jinoiy guruh faoli qo‘lga olingan.
Maxsus xizmatlarga ko‘ra, 41 yoshli Ruslan Bosterinskiy Qirg‘izistonning eng mashhur “qonundagi o‘g‘risi” Qamchi Kolbayevning yaqin sheriklaridan biri bo‘lgan. U Issiqko‘l tumanidagi Bo‘steri qishlog‘ini nazorat qilgan. Bosterinskiy ilgari bosqinchilik va qotillik uchun sudlangan.
U qidiruvda bo‘lgan vaqtida Qirg‘iziston Milliy xavfsizlik davlat qo‘mitasi rahbariga suiqasd uyushtirishni rejalashtirgan. Qo‘lga olingan shaxs tergov izolyatoriga joylashtirilgan. U uyushgan jinoiy guruh tuzish va unda ishtirok etishda ayblanmoqda.
Izoh (0)