Qirg‘iziston prezidenti Sadir Japarovning O‘zbekistonga tashrifi doirasida 16 ta hujjat imzolandi.
Jumladan, Qirg‘izistonning Issiqko‘l viloyatida joylashgan kurort-hordiq xo‘jaligi obyektlari bo‘yicha hukumatlararo bitim imzolandi.
2023-yilning avgust oyida Issiqko‘ldagi sobiq “Dilorom” pansionati o‘zbekistonlik investorlarga foydalanishga topshirilishi mumkinligi haqida xabar berilgandi. O‘zbekiston bosh vaziri Abdulla Aripovning Qirg‘izistonga tashrifi doirasida O‘zbekiston delegatsiyasi “Ene-Say” (sobiq “Dilorom”) pansionatiga tashrif buyurib, uni ko‘zdan kechirgan edi.
Shu bilan birga, joriy tashrif doirasida “Fuqarolarning o‘zaro kelib-ketishlari to‘g‘risidagi hukumatlararo bitimga o‘zgartirishlar kiritish to‘g‘risida bayonnoma” ham imzolandi.
Maʼlumot uchun, 2023-yilning may oyida O‘zbekiston—Qirg‘iziston chegarasidan ID karta orqali o‘tishga ruxsat berilgan edi.
Shavkat Mirziyoyev o‘tgan yilning 27-aprel kuni Qirg‘iziston bilan chegarani ID karta orqali kesib o‘tish to‘g‘risidagi shartnomani ratifikatsiya qilish to‘g‘risidagi hujjatni imzolagan. 2022-yilning dekabr oyida Qirg‘iziston va O‘zbekiston chegarani kesib o‘tishda pasport nazoratini osonlashtirishga kelishib olgani haqida xabar berilgandi.
Bundan tashqari, “O‘zbekiston Respublikasining Jahon savdo tashkilotiga aʼzo bo‘lishi bo‘yicha ikki tomonlama muzokaralarni yakunlash to‘g‘risida bayonnoma” ham imzolandi.
Iyun oyi avvalida Shavkat Mirziyoyev qator davlat kompaniyalarining iqtisodiy faoliyat olib borish bo‘yicha eksklyuziv huquqlarini bekor qilish to‘g‘risidagi farmonga imzo chekkan edi.
Shavkat Mirziyoyev 5-iyun kuni Jahon savdo tashkiloti (JST) bosh direktori doktor Ngozi Okonjo-Ivealani qabul qilgandi. Uchrashuvda O‘zbekistonning JSTga qo‘shilishi borasida ko‘rilayotgan amaliy chora-tadbirlar muhokama qilingan.
Maʼlumot uchun, Qirg‘iziston 1998-yilda JSTga aʼzo bo‘lgan.
Shuningdek, “2024-2026-yillarda Toshkent va Bishkek shaharlari o‘rtasidagi hamkorlikni rivojlantirish bo‘yicha chora-tadbirlar rejasi” ham imzolandi.
Bugun davlat rahbari o‘rtasida bo‘lib o‘tgan muzokaralarda o‘zaro savdo hajmini yaqin yillarda 2 milliard dollar ko‘rsatkichiga chiqish uchun O‘zbekiston va Qirg‘iziston poytaxtlarda savdo uylari tashkil etilishi bo‘yicha kelishuvga erishgan edi.
Shu bilan birga, Toshkent va Bishkekda eksport-import shartnomalari to‘plami shakllantiriladi, eksportoldi moliyalashtirish vositalari joriy etiladi, qishloq xo‘jaligi va chorvachilik mahsulotlarini tezkor tashish bo‘yicha “yashil” yo‘lak ishga tushiriladi.
Shuningdek, tashrif davomida yana quyidagi hujjatlar imzolandi:
- Qurilish faoliyati sohasidagi hamkorlik to‘g‘risida bayonnoma;
- Mehnat, aholi bandligi va migratsiya sohasidagi hamkorlik to‘g‘risida bayonnoma;
- Madaniyat va san’at sohasidagi hamkorlik to‘g‘risida bayonnoma;
- Davlat xizmati sohasidagi hamkorlik to‘g‘risida bayonnoma;
- 2024—2030-yillarda o‘zaro savdo hajmini oshirish bo‘yicha chora-tadbirlar rejasi;
- 2024—2026-yillarda jismoniy tarbiya va sport sohasidagi hamkorlikni rivojlantirish bo‘yicha amaliy chora-tadbirlar rejasi;
- 2024—2026-yillarda qishloq xo‘jaligi va oziq-ovqat ta’minoti sohasidagi hamkorlikni yanada rivojlantirish bo‘yicha “yo‘l xaritasi”;
- O‘zbekiston prezidenti huzuridagi Strategik va mintaqalararo tadqiqotlar instituti hamda Qirg‘iziston prezidenti huzuridagi Strategik tashabbuslar milliy instituti o‘rtasidagi memorandum va boshqalar.
Izoh (0)