Ilon Maskning neyrochiplar ishlab chiqaruvchi Neuralink kompaniyasi Kanada regulyatorlaridan mamlakatda o‘z qurilmasining klinik sinovlarini boshlash uchun ruxsat oldi, deb xabar bermoqda Reuters.
Sinov jarayoni Torontodagi University Health Network (UHN) shifoxonalaridan birida bo‘lib o‘tadi.
“Biz neyroxirurgiya sohasidagi ushbu ilmiy yangilikning yetakchi safida turganimizdan juda faxrlanamiz”, dedi shifoxona rahbari Kevin Smit.
U UHN Kanadadagi Neuralink sinovlari uchun “birinchi va eksklyuziv” joy bo‘lishini qo‘shimcha qildi, ammo sinovlar qachon boshlanishiga aniqlik kiritmadi.
Maskga tegishli bo‘lgan X ijtimoiy tarmog‘idagi Neuralink sahifasida kompaniya Kanada SSVdan odamlarda sinov o‘tkazish uchun ruxsat olgani qayd etilgan.
Kompaniya ALS (amyotrofik lateral skleroz) yoki orqa miya shikastlanishi natijasida kelib chiqqan kvadriplegiya bilan og‘rigan bemorlardan ko‘ngillilarni qidirayotganini elon qilgan. Chip bemorlarga o‘z fikrlari bilan turli qurilmalarni boshqarishga yordam beradi.
Mask kompaniyasi AQSHda bir nechta bemorlarga miya implantlarini o‘rnatgan edi. Kompaniyaning ilk bemori, sakkiz yil avval yelkasidan past qismi shol bo‘lgan 29 yoshli Nolan Arboga ko‘ra, qurilma tufayli u kompyuterdan foydalanishi va hatto video o‘yinlar o‘ynashga qodir bo‘ldi. Erkakning so‘zlariga ko‘ra, chipni implantatsiya qilish unga hayot sifatini yaxshilash, “dunyo bilan qayta bog‘lanish”, ijtimoiy aloqalarni tiklash, erkin bo‘lish va maqsadlarga erishish imkonini bergan.
Izoh (0)