Ilon Maskning neyrochiplar ishlab chiqaruvchi Neuralink kompaniyasi o‘zining birinchi bemori Noland Arbo chip yordamida shaxmat o‘ynay olganini namoyish qildi. Bu haqda BBC xabar berdi.
To‘qqiz daqiqalik jonli efirda Arbo deyarli fikr kuchi bilan ekrandagi kursorni harakatga keltirib, shaxmat o‘ynagan. Bemorning yelkasidan pasti shol bo‘lib qolganidan keyin unga yanvar oyida chip o‘rnatilgan.
“Operatsiya juda oson kechgan”, — degan bemor erkak.
Arboning so‘zlariga ko‘ra, implantatsiya qilingan chip yordamida u sakkiz soat davomida kompyuterda Civilization VI o‘yinini o‘ynay olgan. Biroq u yangi texnologiya mukammal emasligini va tajriba “ba’zi muammolar”siz bo‘lmaganini tan olgan.
Neuralinkning maqsadi murakkab nevrologik kasalliklarni boshqarishda yordam berish uchun inson miyasini kompyuterlar bilan bog‘lashdir. Kompaniyaning tanga o‘lchamdagi qurilmasi bosh suyakka o‘rnatiladi. Mikroskopik simlar yordamida u neyronlarning faolligini aniqlab, kompyuterga simsiz signal orqali ma’lumotlarni uzatadi.
Kompaniya maymunlarda ham sinovlar o‘tkazgandi, jumladan miyasiga neyrochip o‘rnatilgan maymunlar video o‘yini o‘ynay olgan.
AQSH oziq-ovqat va farmatsevtika idorasi (FDA) Neuralink kompaniyasiga 2023-yil may oyida neyrochipni odamlarda sinab ko‘rishga ruxsat bergan. Neuralink ko‘plab boshqa kompaniyalar va universitetlar bilan birgalikda ushbu texnologiyani yaxshilashga va oxir-oqibat tijoratlashtirishga harakat qilmoqda.
Izoh (0)