Amerikada milliarder Ilon Maskga tegishli Neuralink kompaniyasining chipi miyasiga o‘rnatilgan birinchi bemor — Nolan Arbo hayoti qanday o‘zgarganini Business Insider nashriga gapirib berdi.
Bemor chipdan deyarli har kuni ertalab soat 07:00 dan kechgi 23:00 gacha foydalanadi. Neyrokompyuter interfeysi mutaxassislari bilan mashg‘ulotlar kuniga sakkiz soatgacha davom etadi.
Men bundan zavqlansam-da, uni mushkul vazifa deb hisoblamayman, — deydi erkak. Mazkur mashg’ulotlar chipdagi xatoliklarni aniqlash va ularni bartaraf etish uchun kerak.
Chipning o‘zi maxsus dastur orqali Bluetooth yordamida kompyuterga ulanadi. Arbo kursorni fikr kuchi bilan boshqarib, ijtimoiy tarmoqlarda muloqot qila oladi, elektron pochta xabarlariga javob beradi, komikslar o‘qiydi va sayt orqali yapon tilini o‘rganadi.
Arbo qurilmadan foydalanish paytida bir marta uxlab qolgani, shunga qaramay kursor harakatlanishda davom etganini aytgan.
Taxminan besh daqiqa uxlab qoldim va uyg‘onganimda kompyuterda o‘nga yaqin turli xil ilovalar ochiq turardi. Buning oldini olish uchun kursorni o‘chirib qo‘yish mumkin, — deydi u.
Erkakning so‘zlariga ko‘ra, chipni implantatsiya qilish unga hayot sifatini yaxshilash, “dunyo bilan qayta bog‘lanish”, ijtimoiy aloqalarni tiklash, erkin bo‘lish va maqsadlarga erishish imkonini bergan.
O‘zimni ahamiyatli ish qilayotgandek his qilaman. Har kungi ishlarim bundan keyin odamlarga ta’sir qilishini his qilaman, bu doimiy ravishda quvnoq kayfiyatda bo’lishim uchun yetarlidir, — deydi Arbo.
Operatsiyadan bir oy o‘tib, implantning aloqalarida buzilishlar kuzatilgan, buning ta’sirida ma’lumotlar uzatish bilan ham muammo yuzaga kelgan. Qurilmani olib tashlash ehtimoli bo‘lgan, biroq bemor buni istamagan.
30 yoshli Arbo sakkiz yil oldin suvga sakrash chog’ida boshidan shikastlanib, yelkasidan pasti falaj bo‘lib qolgan. Neuralink kompaniyasi 2024-yil yanvarida uning miyasiga neyrochip o‘rnatgan. Erkak fevral oyiga kelib, kursorni boshqarishni o’rganganini ma’lum qilgan.
Izoh (0)