Tesla boshdan kechirayotgan qiyinchiliklar amerikalik milliarder Ilon Maskning boshqa kompaniyalariga tahdid solmoqda, deya Bloomberg xabar berdi.
Xabarga ko‘ra, Tesla aksiyalari pasaymoqda va ishdan bo‘shatishlar ko‘paymoqda, xodimlarning ma’naviyatiga putur yetgan, savdolar esa sust. Ba’zi investorlar kompaniyani “aqlsiz rahbar” boshqarayotganini aytishgan.
Tesla’dan tashqari Ilon Mask SpaceX xususiy raketa va sun’iy yo‘ldosh yetkazib beruvchisi, X ijtimoiy tarmog‘i, Boring Co., Neuralink startapi va AI startapi xAI’ni boshqaradi.
Avvalroq Electrek nashri Tesla butun dunyo bo‘ylab o‘z xodimlarining 10% dan ko‘prog‘ini ishdan bo‘shatish rejalari haqida xabar bergan edi. Mask xodimlarga yo‘llagan maktubida Tesla’ning tez o‘sishi natijasida ba’zi sohalarda rollar va ish funksiyalarining takrorlanishi sodir bo‘lganini va qisqarish kompaniyaga o‘sish bosqichining keyingi sikliga tayyor bo‘lishiga imkon berishini ta’kidlagan.
Shu bilan birga, elektr transport vositalarini yetkazib berishda pasayish kuzatilgan. 2024-yilning birinchi choragida Tesla qariyb 387 mingta elektromobil yetkazib bergan, bu o‘tgan yilning shu davriga nisbatan 8,5 foizga kam.
1-may kuni Reuters agentligi Mask Supercharger zaryadlash tarmog‘ini rivojlantirish bo‘yicha deyarli butun jamoani ishdan bo‘shatib, konsern ishlab chiqaruvchilari va yetkazib beruvchilarini noaniqlikda qoldirganini ma’lum qilgan.
Izoh (0)