Kambodja AQSH prezidenti Donald Trampni tinchlik bo‘yicha Nobel mukofotiga nomzod sifatida ilgari surdi. Bunga sabab sifatida Trampning Kambodja va Tailand o‘rtasidagi chegara mojarosiga yakun yasashdagi roli ko‘rsatildi. Bu haqda Fox News xabar berdi.
Kambodja bosh vaziri o‘rinbosari Sun Chanthol 1-avgust kuni poytaxt Pnompendagi matbuot anjumanida Trampning mintaqada tinchlikni ta’minlashdagi xizmatlarini e’tirof etgan.
“Biz uning tinchlik yo‘lidagi katta sa’y-harakatlarini tan olamiz”, dedi Chanthol.
Uning aytishicha, Tramp davlatlar o‘rtasida do‘stlikni rivojlantirish yo‘lida eng katta hissa qo‘shgan shaxs sifatida ushbu nufuzli mukofotga loyiq.
Donald Tramp o‘tgan hafta Kambodja va Tailand yetakchilari bilan telefon orqali muloqot qilib, tomonlarni otashkesimga undagandi. U, shuningdek, mojaro davom etsa, AQSH ikki davlat bilan savdo muzokaralarini davom ettirmasligini bildirgan. Natijada 28-iyul kuni Malayziyada o‘tgan muzokaralar orqali 10 yillikdagi eng yirik qurolli to‘qnashuvlar to‘xtatilgan. Urushda kamida 43 kishi halok bo‘lgan, 300 mingdan ortiq odam evakuatsiya qilingan.
Oq uyning matbuot kotibi Karolin Leavit ham X tarmog‘ida Trampning to‘g‘ridan-to‘g‘ri ishtiroki tinchlik kelishuviga olib kelganini aytib, shunday dedi:
“Bu Tramp tufayli amalga oshdi. Tinchlik bo‘yicha Nobel mukofotini unga bering!”
Bu Trampning ilk marta Nobel mukofotiga nomzod sifatida tilga olinishi emas. Avvalroq Isroil bosh vaziri Benyamin Netanyaxu ham Trampni ushbu mukofotga nomzod sifatida ko‘rsatgandi. Pokiston rasmiylari esa Hindiston bilan bo‘lgan keskinlikni yumshatishdagi roli uchun uni mukofotga tavsiya qilgan edi.
Kambodja bosh vaziri o‘rinbosari, shuningdek, AQSH hukumatining mamlakatga nisbatan boj stavkalarini kamaytirganidan ham minnatdor ekanini o‘shimcha qilgan. Ta’kidlanishicha, dastlab 49 foiz bo‘lishi kutilgan tarif oxir-oqibat 19 foizgacha tushirilgan. Bu Kambodjaning asosiy eksport sohasi — tikuvchilik sanoatini qutqarib qolgani aytilmoqda.
Izoh (0)