Қорақалпоғистондаги ошхонада 1,5 млрд сўмлик “свет”дан ноқонуний фойдаланилгани маълум бўлди
“Энергия ресурсларини талон-торож қилинишини фош этишга қаратилган назорат тадбирлари давом этмоқда”, деб хабар берди Бош прокуратура матбуот хизмати.
Фото: Бош прокуратура матбуот хизмати
Маълум қилинишича, Қорақалпоғистон Республикаси Тўрткўл туманидаги “Ч.З.” оилавий корхонаси иш бошқарувчиси ошхонани электр тармоғига ноқонуний равишда улаб, жами 1 млрд 523 млн сўмлик электр энергиясини ўғирлаган.
Мазкур ҳолат юзасидан Жиноят кодексининг 169-моддаси (ўғирлик) 4-қисми “а” банди билан жиноят иши қўзғатилиб, гумонланувчи процессуал тартибда ушланган.
Дастлабки тергов давомида етказилган зарардан 550 млн сўмини қопланиши таъминланди.
Энергия ресурсларидан ноқонуний фойдаланиш ҳолатлари ортиб бормоқда
Бугунга қадар Ўзбекистоннинг турли ҳудудларида энергия ресурсларидан ноқонуний фойдаланиш ҳолатлари аниқланмоқда. Ушбу ҳолатларнинг аксариятида миқдор млрд сўмдан ортиқ.
Жумладан, Сирдарёда 683 млн сўмлик “свет”дан ноқонуний фойдаланган шахс ушланган эди. Шунингдек, Сирдарёдаги маиший хизмат кўрсатиш шохобчасида 325 млн сўмлик “свет”дан ноқонуний фойдаланилгани аниқланганди.
Шу билан бирга, Қорақалпоғистон Республикаси ва Тошкентда жами 2 млрд сўмлик “свет”дан ноқонуний фойдаланилгани ҳақида хабар берилган эди.
Ангрендаги метан заправкада 1,1 млрд сўмлик электр энергиясидан ноқонуний фойдаланилгани аниқланган.
Изоҳ (0)