Ruminiya prezidenti Klaus Yoxannis NATO bosh kotibi lavozimiga o‘z nomzodini qo‘ydi. 64 yoshli ruminiyalik siyosatchi arizani 12-mart kuni Buxarestda jurnalistlarga ma’lum qildi. Bu haqda Deutsche Welle xabar berdi.
Uning eslatishicha, Ruminiya 2004-yildan buyon Shimoliy Atlantika alyansi aʼzosi hisoblanadi. Yoxannisning so‘zlariga ko‘ra, Ruminiya hozirgi vaziyatda xavfsizlik sohasida ko‘proq mas’uliyatni o‘z zimmasiga olishi kerak.
Ukraina bilan chegaradosh Ruminiya jiddiy va uzoq muddatli Rossiya tahdidini hisobga olgan holda yangi qarashni shakllantirishga hissa qo‘shishi mumkin, — dedi siyosatchi.
NATOning amaldagi bosh kotibi Yens Stoltenberg NATOda 2014-yildan beri faoliyat yuritadi. Uch marotaba saylanganligi sababli, 2023-yil fevral oyida u mandatni yana uzaytirmasligini e’lon qilgan. Oxirgi marta uning NATO rahbari sifatidagi mandati o‘tgan yilning iyulida Vilnyusdagi sammitda 2024-yil 1-oktyabrgacha uzaytirilgan edi.
Ayni paytda NATO rahbarligiga ehtimoliy nomzod sifatida Niderlandiyaning iste’foga chiqqan bosh vaziri Mark Ryutte ko‘rilmoqda. Uning nomzodi Germaniya, AQSH, Buyuk Britaniya va Fransiya tomonidan qo‘llab-quvvatlangan, ammo Vengriya tomonidan rad etilgan. Sharqiy Yevropa davlatlari NATO rahbarligiga Klaus Yoxannis yoki Estoniya bosh vaziri Kaya Kallasni saylashni afzal deb hisoblaydi.
NATOning navbatdagi bosh kotibi iyul oyida Vashingtonda o‘tadigan NATO sammiti oldidan e’lon qilinishi kutilmoqda. Qaror alyansning barcha a’zolari tomonidan ma’qullanishi lozim.
Izoh (0)