Тошкент вилояти Оҳангарон тумани судида манзил колонияда жазо муддатларини ўтаётган 14 нафар шахснинг ишини кўриб чиқиш вақтида судья мантиясиз, баённома юритмасдан иш кўргани юзасидан хизмат текшируви тайинлангани ҳақида хабар берилган эди.
Ҳолат юзасидан Судьялар олий кенгаши матбуот хизматининг қўшимча ахборотида айтилишича, Тошкент вилоят судлари судьялари малака ҳайъати томонидан ўтказилган хизмат текшируви натижасига кўра, жиноят ишлари бўйича мазкур туман судининг раиси ва судьясига нисбатан огоҳлантириш интизомий жазо чораси қўлланган.
Қўшимча қилинишича, туман суди раиси ва судьяси Тошкент вилоят судлари судьялари малака ҳайъатининг ушбу қарорига нисбатан Судьялар олий малака ҳайъатига (шунингдек, Судьялар олий кенгашига ҳам) шикоят қилиш ҳуқуқига эга.
Маълумот учун, 2024 йил давомида 32 нафар судьянинг ваколати муддатидан аввал тугатилган. Шундан 13 нафари судьялик қасамёдини бузгани учун, 6 нафари Судьялар одоби кодекси талабларини бузгани учун ва 13 нафар судьянинг ўзи ариза бергани учун ваколати муддатидан аввал тугатилган.
Изоҳ (0)