Jinoyat ishlari bo‘yicha Yunusobod tuman sudida sudya Sardor Sodiqov raisligida sobiq qishloq xo‘jaligi vaziri Aziz Voitov va 49 nafar sudlanuvchi ishi ko‘rib chiqilayotgani xabar berilgandi. Sudning 6-sentyabr kuni davom etgan navbatdagi majlisida OAV vakillarining faoliyati cheklab qo‘yildi. Ularga sud majlisida foto, video va audiomaterial olish taqiqlandi.
![](/static/2024/09/06/photo_2024-09-05_18-35-42-pCRXPaDz.jpg)
“Daryo” jurnalistining xabar berishicha, OAV vakillari shundan so‘ng sud zalini tark etgan.
“Advokat Abduraimov sudga jurnalistlarni kiritmaslik haqida iltimosnoma berdi. Bu iltimosnoma bir nechta advokatlar va sudlanuvchilar tomonidan qo‘llab-quvvatlandi. Biroq hamma advokatlar ham buni qo‘llamadi. Biz shu paytda jurnalistlarga ham so‘z berilib, ularning ham fikri eshitiladi deb o‘ylagandik. Ammo bizga navbat berilmadi. Maslahatxonaga kirgan sudya advokatlar iltimosnomasini qisman qanoatlantirganini aytib, sud majlisida jurnalistlarning foto, video va audiomateriallar olishini taqiqladi. Sudyaga ko‘ra, jurnalistlar sud majlisida ishtirok etib, ma’lumotlarni qo‘lyozma tarzida yozib olishi va shu tarzda yoritishi mumkin”, deydi “Kun.uz” internet nashri jurnalisti Baxtiyor To‘xtayev.
![](/static/2024/09/06/photo_2024-09-06_21-18-25-VO6xmjtH.jpg)
Jurnalist sudning ayni paytdagi harakati OAV vakillari faoliyatini cheklaganini aytmoqda.
“Sudda so‘z berishsa, sud tergovi paytida faoliyatimizni qisman cheklab, ayni paytdagi jarayonlar — sudlanuvchilarning shaxsiga aniqlik kiritilishi, ayblov xulosasining o‘qib eshittirilishi bilan bog‘liq holatlarda audio, foto va videoga ruxsat berishlari kerakligini tushuntirmoqchi edim”, — deydi jurnalist.
“Gazeta.uz” nashri muxbiri Mirolim Isajonov rasmiy axborotlarda ochiq sud deya bong urilayotgan sud yopiq suddan farqli bo‘lmayotganini aytmoqda.
![](/static/2024/09/06/photo_2024-09-06_21-18-24-mx_mmF9o.jpg)
“Rasmiy bayonotlarda ochiq sud deyilyapti. Lekin ichkaridagi holatni ko‘ryapsiz. Bunaqa tartibda yoritgandan yoritmagan ma’qul. Chunki biz jurnalistlarga fakt kerak. O‘tgan sud majlisini yozgan jurnalistlarni bo‘rttirib yozdi deyishyapti, ertaga audio yoki videofakt bo‘lmasa bizga ham shunday tamg‘ani qo‘yishi, sudlashishgacha borishlari mumkin. Shu uchun bunga qarshiman va sud majlisidan chiqib ketdim”, deydi jurnalist.
Mirolim Isajonovning bildirishicha, bugunga qadar bo‘lib o‘tgan Nukus voqealari va “Dok-1 Maks” sudlarida jurnalistlarga hech qanday to‘siq qo‘yilmagan. Ushbu sud majlislarini bugungi sudyalarga namuna qilib ko‘rsatsa bo‘ladi.
“Masalan Nukus voqealari ishi, shuningdek, “Dok-1 Maks” aybdorlari ishi ko‘rib chiqilgan sud majlislarida dastlab sudlanuvchilar va advokatlar OAV ishtirokiga qarshi bo‘lsa-da, sudya bu ishlar jamoatchilik nazoratida ekanini, shuningdek, sudning shaffofligini ta’minlash uchun ham majlislarda jurnalistlar ishtiroki muhim deya, bizning ishlashimiz uchun zamin yaratgandi. Nukus voqealari sudi “Gazeta.uz” sayti orqali onlayn yoritib borilgandi”, deydi suhbatdosh.
“Gazeta.uz” jurnalistining qo‘shimcha qilishicha, bugungi sud majlisida sudya Sardor Sodiqov telefon o‘ynab o‘tirgan. Jurnalist bu holatni suratga olmoqchi bo‘lganida Milliy gvardiya xodimlari jurnalistga qarshilik ko‘rsatib, sudya ruxsatisiz sud zalida suratga olish mumkin emasligini aytgan.
“Qalampir.uz” jurnalisti Hulkar Murtazoyevaning aytishicha, bugungi sudda davlat ayblovchisi ham jurnalistlarning suddan chiqarib yuborilishini so‘ragan.
![](/static/2024/09/06/photo_2024-09-06_21-18-23-g-J2bhCi.jpg)
“Sudga kirish mumkin ekan, ammo yoritish mumkinmas, yozib olish mumkin, diktofon ishlatish mumkinmas, kimlar ko‘rsatma berganini yozish mumkin, lekin nima deb ko‘rsatma berganini yozish mumkin emas ekan. Unda biz qanday ishlaymiz?”, deydi Hulkar Murtazoyeva.
“Sevimli” telekanalining “Zamon” informatsion dasturi jurnalisti Mo‘tabar Nurmuhammedovaning aytishicha, sudya Sardor Sodiqov ochiq sudni yopiq sudga aylantirish uchun advokatlardan qurol sifatida foydalangan.
![](/static/2024/09/06/mmm111-2SvRY00n.jpg)
“Bu sudda ishtirok etayotgan advokatlarning aksariyati jurnalistlarni tanimas, bilmas ekan. Shunday bo‘lsa-da, bizni huquqiy bilimsizlikda ayblashgani shaxsan meni xafa qildi. Aynan shu sudga raislik qiluvchi sudya bizning nelarga qodirligimizni, qanday jurnalist ekanimizni yaxshi bilardi. Advokatlar bizning kasbiy mahoratimizga ishonmasa sudyadan so‘rashlari mumkin edi. Mening nazarimda sudya ochiq sudni yopiqqa aylantirish uchun aynan advokatlardan, ularning fikrlaridan qurol sifatida foydalandi”, deydi Mo‘tabar Nurmuhammedova.
“Sevimli” telekanali muxbiri ham sudya Sardor Sodiqov sud majlisida telefon o‘ynab o‘tirganini tasdiqladi.
“Sudda bizga foto, video va audio olishga to‘siq qo‘yilgach, chiqib keta boshladik. Shunda sudlanuvchilarning yaqinlari va ayrim advokatlar telefon raqamlarimizni so‘rashdi. Nega desak, agar sudning qarori adolatsiz bo‘lsa, ularni qoniqtirmasa bizga murojaat qilishlarini aytishdi. Eng yomoni advokatlar va sudlanuvchilar OAVdan qurol sifatida foydalanishmoqchi bo‘lyapti. Bugungi sud majlisini yoritishga kelganda esa yovqarash qilib, erkin faoliyatimizga to‘siq bo‘lishmoqda”, deydi jurnalist.
Avvalgi sud majlislarida sudda so‘z olgan advokatlardan biri Temur Rahmatov internet nashrlarining birida sobiq vazir Aziz Voitov ishi sudda ko‘rib chiqilgani va 7 yilga ozodlikdan mahrum qilingani yozilganini aytib, jurnalistlarni noto‘g‘ri axborot tarqatayotganlikda ayblagandi. Shuningdek, sudda so‘z olgan va ism-sharifini aytmagan yana bir advokat sudda qatnashayotgan jurnalistlar xorijliklar agenti bo‘lishi mumkinligini aytib, shu bois ularga sudni yoritishni taqiqlash kerakligini taklif qilgandi.
Izoh (0)