Isroil armiyasi “Hizbulloh” harakatining Bayrut chekkasida joylashgan yerosti omboriga zarba berilganini e’lon qildi.
“Bir muddat avval Isroil havo kuchlari “Hizbulloh”ga tegishli strategik qurollar saqlanadigan omborga hujum qildi. U Bayrutdagi “Hizbulloh”ning asosiy tayanchi bo‘lgan Dahiya tumanida joylashgan”, deyiladi Isroil armiyasi xabarida.
Isroil harbiylarining taʼkidlashicha, armiya Livandagi 140 ta nishonga zarba bergan. Bularga qurol omborlari, ishga tushirish moslamalari va boshqa “terrorchilik infratuzilmasi” kiradi.
Al Jazeera nashri “Hizbulloh” Isroil shimoliga to‘rtta raketa hujumi uyushtirganini xabar bergan. Harakatga ko‘ra, Isroil artilleriya pozitsiyalariga hujum qilingan. Isroil tomonining xabar berishicha, Livandan 50 ta snaryad otilgan.
23-sentyabr kuni Isroil Livanda “Shimol o‘qlari” operatsiyasi boshlanganini e’lon qilgan edi. 1-oktyabr kuni Isroil Livan janubida quruqlikdagi operatsiyasini boshlagan. Operatsiyadan maqsad evakuatsiya qilingan 60 ming isroillikning shimoldagi chegarada joylashgan aholi punktlariga xavfsiz qaytishi uchun “Hizbulloh” tahdidini bartaraf etish ekani aytilgan.
Izoh (0)